Bu gün Ümumdünya Fəlsəfə Günüdür
Bakı, 20 noyabr, AZƏRTAC
Hər il noyabr ayının üçüncü cümə axşamı Ümumdünya Fəlsəfə Günü kimi qeyd edilir.
AZƏRTAC xəbər verir ki, bu əlamətdar günün qeyd olunmasında məqsəd bəşər təfəkkürünün inkişafı, hər bir mədəniyyət və fərd üçün fəlsəfənin əhəmiyyətini vurğulamaqdır. Ümumdünya Fəlsəfə Günü 2002-ci ildə təsis edilib.
Fəlsəfə cəmiyyətləri dəyişdirə bilən elm və gündəlik təcrübədir. Dünyadakı intellektual cərəyanların müxtəlifliyini kəşf etməyə imkan verməklə fəlsəfə mədəniyyətlərarası dialoqa, daha tolerant cəmiyyət qurmağa kömək edir. Cəmiyyətdə dəyişiklik üçün intellektual şərait yaradan fəlsəfə müasir çağırışları anlamaqda və onlara cavab verməkdə mühüm rol oynayır.
Azərbaycanda fəlsəfi fikrin inkişafını izləmək üçün keçmişin mühüm yazılı abidələri – Avesta, pəhləvi mətnləri, qədim yunan filosofları və tarixçilərinin əsərləri, orta əsrlərin yazılı abidələri, ölkə ərazisindəki arxeoloji qazıntıların materialları, dil və şifahi ədəbiyyat tarixinin tədqiqi və s. araşdırmalar geniş imkanlar yaradır. Azərbaycanın fəlsəfi fikir tarixində İslam dininin müddəaları xüsusi yer tutur. Əbülhəsən Bəhmənyar, Əbuhəfs Sührəvərdi, Eynəlqüzat Miyanəci, Şihabəddin Sührəvərdi, Nizami Gəncəvi, Əfzələddin Xunəci, Siracəddin Urməvi, Nəsirəddin Tusi, İmadəddin Nəsimi, Məhəmməd Füzuli, Rəcəbəli Təbrizi, Abbasqulu ağa Bakıxanov, Mirzə Fətəli Axundzadə və başqaları Azərbaycanda fəlsəfi fikrin inkişafında mühüm rol oynayıblar.
Hazırda süni intellekt cəmiyyət həyatının bütün sahələrinə təsir etdiyi üçün əsas məsələlərdən biri süni intellektin fəlsəfəsidir. Digər mühüm məsələ aparılan tədqiqatların azərbaycançılıq ideologiyası ilə bağlı olmasının zəruriliyidir. 2025-ci il Azərbaycanda “Konstitusiya və Suverenlik İli”ndə bu mövzulara xüsusi diqqət yetirilir.
Bölmənin digər xəbərləri
