Budapeşt aeroportunda sərnişin axını demək olar ki, tam bərpa olunub
Budapeşt, 19 oktyabr, AZƏRTAC
Budapeşt Beynəlxalq Aeroportu bu ilin avqust ayı ərzində 702.524 sərnişinə xidmət edib.
AZƏRTAC xəbər verir ki, bu məlumat Ferens List adına hava limanının operatorunun press-relizində dərc edilib. COVID-19 pandemiyası başlanandan bəri bu aeroportda bir ay ərzində xidmət göstərilmiş sərnişinlərin rekord sayı avqust ayında müşahidə olunub. Bu rəqəm ötən ilin avqust ayında sərnişin axını göstəricisi ilə müqayisədə 78 faiz çoxdur.
Bütün yay fəsli ərzində Budapeşt aeroportunda xidmət göstərilmiş sərnişinlərin ümumi sayı 1.507.079 nəfər olub. Əvvəlki ilin yayı ilə müqayisədə bu rəqəm 92 faiz artım deməkdir.
2019-cu ilin avqust ayında uçuşların həyata keçirildiyi istiqamətlərin təqribən 80 faizi bərpa olub. Hazırda səyahətçilər 106 marşrut arasında seçim edə bilərlər. Yaxın aylarda bu marşrutların sayı 120-yə çata bilər.
Statistik göstəricilərin artması ilə əlaqədar aeroportla şəhər arasında işləyən avtobusların sayı və gündəlik iş vaxtı artır.
Pərvanə Qarayeva
AZƏRTAC-ın xüsusi müxbiri
Budapeşt
Bölmənin digər xəbərləri
