MƏDƏNİYYƏT
Budapeştdə “Azərbaycan karikatura sənəti” mövzusunda sərgi açılmışdır
Budapeşt, 22 iyun (AZƏRTAC). Azərbaycan Respublikasının Macarıstandakı səfirliyi, Azərbaycan Karikaturaçı Rəssamlar Birliyinin və Budapeştdəki Uypeşt Rəsm Qalereyasının birgə təşkilatçılığı ilə “Azərbaycan karikatura sənəti” mövzusunda sərgi açılmışdır.
Uypeşt Rəsm Qalereyasında təşkil olunan və müxtəlif rəssamların 60-a yaxın əsərinin nümayiş etdirildiyi sərgi öz aktuallığı və kəskin tənqidi ruhu ilə seçilən karikatura sənətimizin 100 ildən artıq bir müddətdə keçdiyi inkişaf yolu haqqında təsəvvür yaradır.
Sərgi yaratdığı tiplərin karikaturaçı rəssamların yaradıcılığında mühüm yer tutduğu böyük Azərbaycan satirik şairi Mirzə Ələkbər Sabirin bu il geniş qeyd olunan 150 illik yubileyinə həsr edilmişdir.
Sərgini Uypeşt Rəsm Qalereyasının rəhbəri, tanınmış macar sənətşünası İştvan Gelleri və Azərbaycanın Macarıstandakı səfiri Vilayət Quliyev açmışlar.
Səfir V.Quliyev açılış mərasimindəki çıxışında milli karikatura sənətimizin məşhur “Molla Nəsrəddin” jurnalı ilə başlayan ənənələrindən və keçdiyi zəngin inkişaf yolundan, müxtəlif tarixi mərhələlərdəki özünəməxsusluqlarından ətraflı bəhs etmişdir. “Molla Nəsrəddin” jurnalında çap olunan və sərginin ekzpozisiyasında mühüm yer tutan karikaturaların təkcə Azərbaycan reallıqlarını əks etdirmədiyi, Yaxın Şərq və Mərkəzi Asiya ölkələrinin xalqları üçün də mühüm təsir və tərbiyə məktəbi olması fikri xüsusilə vurğulanmışdır. Səfir sovet dövründə karikatura sənətinin cəmiyyətdəki çatışmazlıqları tənqid edən və ictimai fikri mövcud problemlərə yönəldən əsas yaradıcılıq sahələrindən biri olmasını da diqqətə çatdırmışdır.
Uypeşt Rəsm Qalereyasının rəhbəri İştvan Gelleri Azərbaycan karikatura sənətinin öz kamilliyi, cəsarəti, aktuallığı, ictimai və mənəvi həyat faktlarına kəskin və operativ müdaxiləsi ilə onda və həmkarlarında xoş bir heyrət hissi yaratdığını etiraf etmişdir.
Sərginin Azərbaycan karikatura sənətinin keçdiyi inkişaf yolundan bəhs edən rəngli bukleti Azərbaycan, macar və ingilis dillərində çap olunaraq iştirakçılar arasında yayılmışdır.
Böyük maraqla qarşılanan sərginin açılış mərasimində macar rəssamları və ölkənin yaradıcılıq təşkilatlarının üzvləri, Budapeştdə akkreditə olunmuş diplomatik korpusun təmsilçiləri, mətbuat və ictimaiyyət nümayəndələri iştirak etmişlər.
Sərgi iki həftə davam edəcəkdir. Ekspozisiyanı Macarıstanın digər şəhərlərində də nümayiş etdirmək nəzərdə tutulmuşdur.
Pərvanə Qarayeva
AZƏRTAC-ın xüsusi müxbiri
Budapeşt