MƏDƏNİYYƏT
Budapeştdə dünya şöhrətli Azərbaycan musiqiçiləri Niyazi və Fikrət Əmirovun yubileylərinə həsr olunmuş konsert keçirilmişdir
Budapeşt, 19 noyabr (AZƏRTAC). XX əsr Azərbaycan musiqi mədəniyyətinin dünya miqyasında tanınan nümayəndələri Niyazi və Fikrət Əmirovun yubileyləri Macarıstanın paytaxtı Budapeşt şəhərində qeyd olunmuşdur.
Azərbaycanın Macarıstandakı səfirliyinin təşəbbüsü ilə Budapeştin məşhur “Dunay” Simfonik Orkestri ölkəmizin tanınmış incəsənət ustaları ilə birlikdə maestro Niyazinin 100, Fikrət Əmirovun 90 illik yubileyləri münasibətilə böyük konsert proqramı təqdim etmişlər.
Konsertin əvvəlində Azərbaycanın Macarıstandakı səfiri Vilayət Quliyev çıxış edərək XX əsr Azərbaycan musiqi mədəniyyətinin keçdiyi zəngin inkişaf yolu, ünlü sənətkarlar Niyazi və Fikrət Əmirovun Azərbaycan və dünya musiqi sənətinə verdikləri böyük töhfələr barədə danışmışdır.
Xalq Artisti, Azərbaycan Dövlət Akademik Opera və Balet Teatrının dirijoru Yalçın Adıgözəlovun rəhbərliyi altında orkestr Niyazinin “Rast” simfonik muğamını, Fikrət Əmirovun “Azərbaycan kapriççiosu”, “Kürdovşarı” simfonik muğamlarını və “Nəsimi” baletindən süitanı böyük müvəffəqiyyətlə ifa etmişdir.
Dövlət Akademik Opera və Balet Teatrının solistləri, Azərbaycanın Xalq Artisti Azər Zeynalov və Əməkdar Artist Gülnaz İsmayılova yubilyarların əsərlərindən vokal partiyaları ustalıqla ifa etmişlər. Fikrət Əmirovun “Sevil” operasından Sevilin və Balaşın ariyaları və dueti, Niyazinin “Arzu” romansı tamaşaçılar tərəfindən hərarətlə qarşılanmışdır.
Budapeştin mərkəzindəki “Duna Palota” sarayında keçirilən yubiley konsertində Macarıstan incəsənət xadimləri, diplomatik korpusun nümayəndələri, musiqi həvəskarları iştirak etmişlər.
Pərvanə Qarayeva
AZƏRTAC-ın xüsusi müxbiri
Budapeşt