Burundi Prezidenti vəfat edib
Qahirə, 10 iyun, AZƏRTAC
Burundinin 55 yaşlı Prezidenti Pierr Nkurunziza infarktdan vəfat edib. Bu barədə ölkənin Prezident administrasiyası məlumat yayıb. Qeyd olunub ki, idman zalında voleybol matçını izləyən dövlət başçısının halı qəflətən pisləşib. O, dərhal xəstəxanaya çatdırılıb və orada dünyasını dəyişib. Burundi parlamenti Prezidentin vəfatı ilə əlaqədar ölkədə yeddigünlük matəm elan edib.
AZƏRTAC xəbər verir ki, dünyanın nüfuzlu media orqanları Şərqi Afrikanın bu kiçik ölkəsinin liderinin həyat yoldaşının COVID-19 virusundan müalicə olunduğunu və onun özünün də ölüm səbəbinin koronavirus ola biləcəyini yazıb. Qeyd olunub ki, avqustda səlahiyyət müddəti başa çatan və 15 il ərzində münaqişələrlə çalxalanan ölkəyə başçılıq edən Nkurunziza yeni növ koronavirus pandemiyasına inanmırdı. O, hətta Ümumdünya Səhiyyə Təşkilatının və BMT-nin yerli ofislərini ölkədən çıxarmışdı.
Burundinin yeni Prezidenti Evariste Ndayyişimiyenin avqustda keçiriləcək inauqurasiya mərasiminə qədər olan müddətdə ölkəyə parlamentin sədri Paskal Nyabenda başçılıq edəcək.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
