İQTİSADİYYAT
Cari ilin altı ayı tovuzlular üçün uğurlu olmuşdur
Tovuz, 6 avqust (AZƏRTAC). Tovuz Rayon İcra Hakimiyyətində cari ilin altı ayının yekunlarına və qarşıda duran vəzifələrə həsr olunmuş iclas keçirilmişdir.
AZƏRTAC xəbər verir ki, iclasda rayon icra hakimiyyətinin başçısı Tofiq Zeynalovun hesabat məruzəsi dinlənilmişdir. Bildirilmişdir ki, bu il iyulun 5-də Tovuz rayonunun tarixinə daha bir şərəfli gün yazılmış, Azərbaycan Prezidenti İlham Əliyev son altı ildə beşinci dəfə Tovuza səfər etmiş, rayonda aparılan tikinti-quruculuq və abadlıq işləri ilə tanış olmuş, rayonun sosial-iqtisadi inkişafı və qarşıda duran vəzifələr barədə öz tapşırıq və tövsiyələrini vermişdir. Dövlət başçısı Tovuzda aparılan tikinti-quruculuq işlərindən, infrastruktur layihələrinin icrasından razılığını bildirmişdir.
Diqqətə çatdırılmışdır ki, hesabat dövründə 3 milyon 574 min manatlıq sənaye, 21 milyon 236 min manatlıq kənd təsərrüfatı məhsulları istehsal olunmuş, 416 min manat həcmində poçt və rabitə xidməti göstərilmiş, pərakəndə əmtəə dövriyyəsinin həcmi 120 milyon 127 min manat təşkil etmiş, əhaliyə 23 milyon 52 min manat həcmində pullu xidmətlər göstərilmişdir. Nəqliyyat sektorunda yük daşınması 254 min ton təşkil etmişdir.
Keçən ilin müvafiq dövrü ilə müqayisədə kənd təsərrüfatında 12,4 faiz, pərakəndə əmtəə dövriyyəsində 11,4 faiz, əhaliyə göstərilən pullu xidmətlərin həcmində 12,6 faiz, poçt və rabitə xidmətinin həcmində 8,6 faiz, əsas kapitala yönəlmiş investisiyalarda 14,3 faiz artım əldə edilmişdir.
Tovuz şəhərinin Heydər Əliyev prospektinə, S.Vurğun, R.Məmmədov, S.Məmmədov, H.Aslanov, M.Ə.Sabir, İ.Mürşüdov küçələrinə, Tovuz-Ağdam avtomobil yolunun “Turan” şadlıq evindən “Qazıqulu dairəsi”nədək olan hissəsinə, Qovlar şəhərinin Azadlıq prospektinə və Vağzal küçəsinə 101 min kvadratmetrə qədər asfalt-beton örtük qoyulmuşdur.
Bu il 220 şagird yerlik Bayramlı kənd tam orta məktəbinin tikintisi başa çatdırılmış, 180 şagird yerlik Papaqçılar kənd tam orta məktəbinin tikintisi davam etdirilir. Həmçinin 220 şagird yerlik Şamlıq kənd, 180 şagird yerlik Çeşməli, 80 şagird yerlik Muncuqlu, 80 şagird yerlik Qaradaş, 80 şagird yerlik Qalaboyun kənd tam orta məktəblərinin layihə smeta sənədlərinin işlənməsi üçün vəsait ayrılmış və müvafiq sənədlər dövlət ekspertizasından keçirilmişdir.
“Semzavod qəsəbəsi” adlanan ərazidə yerləşən baraklarda yaşayan ailələri yeni mənzillərlə təmin etmək məqsədi ilə 50 mənzilli və 35 mənzilli iki beşmərtəbəli binanın tikintisi davam etdirilir, cari ildə bu binaların istifadəyə verilməsi nəzərdə tutulur.
Qeyd olunmuşdur ki, üzüm və digər meyvələrin saxlanması üçün rayonda 3745 ton gücündə 10 ədəd soyuducu kamera fəaliyyət göstərir. İki soyuducu kameranın tikintisi isə hazırda davam edir. Bu da il ərzində bölgə əhalisini təzə meyvə ilə təmin etməyə imkan yaradır, rayonun ixrac potensialını xeyli artırır.
Altı ayda rayon icra hakimiyyətinə 590 vətəndaş müraciəti daxil olmuş və 520 nəfər rayon icra hakimiyyəti başçısı tərəfindən qəbul edilmişdir.
Yerlərdə səyyar qəbul-görüşlərin keçirilməsi praktikası artıq özünü doğrultmuşdur. İlin birinci yarısında yaşayış məntəqələrində 22 səyyar qəbul görüş keçirilmiş və bu görüşlərdə yerli sakinlər tərəfindən 150 təklif səslənmişdir. Bu təkliflərin əksəriyyəti rayonun sosial iqtisadi inkişafının proqnozlaşdırılmasında nəzərə alınmış və öz həllini tapmaqdadır.
İclasda rayonun mədəniyyət, səhiyyə, təhsil və digər sahələrində görülən işlər də hərtərəfli təhlil olunmuşdur.