Bakı, 1 mart, Ramiz Quliyev, AZƏRTAC

Martın 1-də Bakıda “Caspian European Club” (“Caspian Business Club”) və “Caspian American Club” da Azərbaycan Respublikasının Prezidenti yanında Mənzil İnşaatı Dövlət Agentliyinin direktoru Samir Nuriyevin iştirakı ilə keçirilən biznes-forumda güzəştli mənzillərin tikintisi ilə bağlı müzakirələr aparılıb.

AZƏRTAC xəbər verir ki, “Caspian European Club”un sədrinin birinci müavini və baş icraçı direktoru Telman Əliyev “Caspian European Club”un (Caspian Business Club) 2002-ci ilin iyununda Xəzər-Qara dəniz regionunda fəaliyyət göstərən nəhəng neft-qaz şirkətlərinin dəstəyilə yaradıldığını xatırladıb. “Caspian European Club”un sədrinin Azərbaycan Respublikası Prezidenti İlham Əliyevin olduğunu vurğulayıb.

Qeyd edib ki, “Caspian American Club”un yaradılması təşəbbüsü də Azərbaycanın dövlət başçısına məxsusdur.

Onun sözlərinə görə, təsis olunduğu ilk gündən “Caspian European Club” neft sahəsindən əldə olunan gəlirlərin qeyri-neft sektorunun inkişafına cəlb edilməsinə kömək edir. Sıralarında 5 mindən artıq şirkət və təşkilatı birləşdirən “Caspian European Club” dünyanın 50 ölkəsində fəaliyyət göstərir və dövlət qurumları ilə özəl sektor arasında dialoqa dəstək istiqamətində fəal iş aparır.

Mənzil İnşaatı Dövlət Agentliyinin direktoru Samir Nuriyev Agentliyin fəaliyyəti və həyata keçirilən layihələr barədə məlumat verib.

Vurğulayıb ki, vətəndaşların mənzil-məişət şəraitinin yaxşılaşdırılması Azərbaycan dövlətinin sosial siyasətinin əsas prioritetlərindən biridir. Bununla bağlı olaraq, 2016-cı ildə Prezident İlham Əliyevin təşəbbüsü və dəstəyi ilə mənzillərin əlçatanlığının artırılması və güzəştli mənzillərin tikintisi üzrə planların gerçəkləşdirilməsinə başlanılıb.

Onun sözlərinə görə, layihənin dayanaqlılığını və uzunmüddətliliyini təmin etmək üçün özəl sektor cəlb edilməlidir ki, bu da əsas istiqamətlərdən biridir.

Samir Nuriyev rəhbərlik etdiyi qurumun güzəştli mənzil sahəsində beynəlxalq təcrübədən də bəhrələndiyini diqqətə çatdırıb. Bu baxımdan Türkiyə təcrübəsi böyük önəm kəsb edib. Bununla yanaşı, həm də Almaniya, Rusiya və başqa ölkələrin təcrübəsi də öyrənilib. Bu proses daim davam edir. Agentlik bu sahədə təcrübəyə malik beynəlxalq təşkilatlarla da əlaqələr qurur.

Direktor deyib ki, uyğun qiymətə mənzil təminatının inkişafı üzrə Strateji Yol Xəritəsi üç mərhələni nəzərdə tutur: 2020-ci ilə kimi, 2025-ci ilə qədər və ondan sonrakı dövrü. İlkin öhdəlik çərçivəsində bu sahədə 2020-ci ilə kimi 10 min iş yerinin yaradılması nəzərdə tutulur.

Qeyd olunub ki, yaşayış kompleksinin tikintisi üçün seçilmiş məkanın üstünlüklərindən biri də onun paytaxtın əsas iş yeri mərkəzlərinə yaxın yerləşməsidir. Bununla yanaşı, ərazidə yaradılacaq yeni nəqliyyat infrastrukturunun Bakının mövcud yol və ictimai nəqliyyat şəbəkəsi ilə inteqrasiyası nəzərdə tutulur. Bu isə sakinlərin çox vaxt itirmədən istədikləri yerə çatmalarına imkan verəcək.

İnşa olunacaq mənzillərin vətəndaşlar tərəfindən alınması prosesində səffaflığın təmin edilməsinə xüsusi diqqət göstəriləcək. Bu məqsədlə “Elektron hökumət” portalında “Güzəştli mənzil” elektron sistemi yaradılacaq.

Görüşdə özəl sektorla əməkdaşlığın mümkün istiqamətləri, habelə “Caspian European Club” və “Caspian American Club”un üzvləri olan şirkətləri maraqlandıran digər suallar ətrafında müzakirələr aparılıb.

Dövlət və sahibkarlar arasında səmərəli dialoqun qurulması üçün yaradılmış şəraitə görə klubun rəhbərliyinə minnətdarlığını bildirən agentliyin direktoru hökumətin sosial siyasətinin reallaşdırılmasında özəl sektorun iştirakının əhəmiyyətini xüsusilə vurğulayıb. Eyni zamanda, Samir Nuriyev biznes-forum iştirakçılarını “Azərbaycanda uyğun qiymətə mənzil təminatının inkişafına dair Strateji Yol Xəritəsi” ilə müəyyən edilən güzəştli mənzil bazarının inkişaf prioritetləri haqqında da məlumatlandırıb.

Azərbaycan Respublikası Prezidentinin 6 dekabr 2016-cı il tarixli müvafiq Fərmanı ilə təsdiq edilən bu strateji sənədə istinad edən Samir Nuriyev güzəştli mənzillərin tikintisi layihələrinin reallaşdırılmasının mümkün mexanizmləri və dövlət-özəl əməkdaşlıq modelləri barədə də danışıb.

Biznes-forumda Samir Nuriyevə “Caspian European Club” və “Caspian American Club”un fəxri üzvlük sertifikatı təqdim olunub.

Tədbirdə şirkət rəhbərləri və səfirlər, bir sıra diplomatik qurumların və beynəlxalq təşkilatların nümayəndələri iştirak ediblər.