CƏMİYYƏT
Cəlil Xəlilov: Brüssel görüşü diplomatiyamızın tarixi uğurlarından biridir
Bakı, 24 may, AZƏRTAC
Brüssel görüşü Azərbaycan diplomatiyasının tarixi uğurlarından biridir. Çünki bu görüş nəticəsində əldə edilən razılaşmalarda dövlətimizin maraqları tam şəkildə əksini tapıb. Nümunə üçün qeyd edim ki, görüşlə bağlı mətbuata verilən bəyanatda bir dəfə də olsun “Dağlıq Qarabağ” ifadəsi işlədilməyib. Halbuki, Ermənistan hakimiyyəti bundan əvvəl dəfələrlə bu ifadəyə müraciət edir, hətta “Dağlıq Qarabağ”a müstəqillik tələbi səsləndirirdi. Ancaq Brüssel danışıqları ilə bağlı bəyanatda “Dağlıq Qarabağ” ifadəsi yer almadı. Bu faktın özü Azərbaycan diplomatiyasının prinsipiallığından onun milli maraqlarımızı uğurla müdafiə etməsindən xəbər verir. Bu, həm də dövlətimizin başçısının dəfələrlə səsləndirdiyi bir həqiqəti - “Azərbaycanda artıq Dağlıq Qarabağ adında inzibati ərazi vahidi yoxdur” - gerçəyini yada salır.
AZƏRTAC xəbər verir ki, bunu Müharibə, Əmək və Silahlı Qüvvələr Veteranları Təşkilatının sədr müavini, hərbi-siyasi ekspert, polkovnik Cəlil Xəlilov deyib.
Avropa İttifaqı Şurasının prezidenti Şarl Mişelin təşkilatçılığı və iştirakı ilə Brüsseldə Prezident İlham Əliyev və Ermənistanın baş naziri arasında keçirilmiş görüşdə bir sıra məsələlərlə bağlı razılığın əldə olunduğunu bildirən C.Xəlilov onun mühüm əhəmiyyətə malik olduğunu qeyd edib: “Görüşlə bağlı diqqət çəkən məqamlardan biri də Azərbaycan tərəfinin rəsmi İrəvanın bir sıra addımları ilə bağlı narazılıq və narahatlığını açıq şəkildə dilə gətirməsi, Ermənistan hökumətinin qeyri-səmimi davranışını ifşa etməsi ilə bağlıdır. Görüşdə Ermənistanın Azərbaycana verdiyi mina xəritələrin dəqiqlik göstəricinin 25 faizə yaxın olması, birinci Qarabağ müharibəsində itkin düşən dörd minə yaxın insanın taleyinə aydınlıq gətirməməsi və s. kimi məqamlara da açıq şəkildə toxunulub, bütün bu məsələlər əsas müzakirə predmetlərindən birini təşkil edib. Nəqliyyat-kommunikasiya əlaqələrinin bərpa edilməsi, sülh müqaviləsinin imzalanması məqsədi ilə danışıqların davam etdirilməsi də Brüssel görüşündə müzakirə edilən əsas məsələlərdən biri oldu”.
Hərbi-siyasi ekspert Brüssel görüşünün, ümumilikdə bir sıra konkret nəticələri ilə həm də dövlətimizin, xalqımızın sülh istəyinin bir daha nümayiş etdirilməsi ilə yadda qaldığını bildirib. Bu görüş bir daha bütün dünyaya göstərdi ki, Azərbaycan sülh dövlətidir və regionda sülhün təmin edilməsi, sabitliyin qorunub saxlanılması üçün bütün imkanlardan maksimum istifadə edir. Bu baxımdan hesab edirəm ki, Brüssel görüşünün nəticələri bundan sonra aparılacaq danışıqlar üçün əlverişli zəmin formalaşdıracaq, Azərbaycanın diplomatik müstəvidə yeni uğurlar qazanmasını stimullaşdıracaq.