REGİONLAR
Cəlilabadda Avropa İttifaqının maliyyə dəstəyi ilə Aqroturizm Nümayiş Fermer Təsərrüfatları yaradılır
Cəlilabad, 25 sentyabr, Bağır Əliyev, AZƏRTAC
Avropa İttifaqının maliyyə yardımı ilə “Yerli İdarəetməyə Yardım” İctimai Birliyi tərəfindən ölkəmizin cənub bölgəsində “Şəfəq” Ekoturizm İctimai Birliyi ilə əməkdaşlıq çərçivəsində icra edilən “İcma əsaslı aqroturizmin kənd yerlərinin inkişaf strategiyası olaraq təşviqi" layihəsi çərçivəsində Cəlilabad rayonunda Aqroturizm Nümayiş Fermer Təsərrüfatının yaradılması işləri həyata keçirilir.
AZƏRTAC-ın bölgə müxbiri xəbər verir ki, aqroturizm kənd təsərrüfatı və turizmin birgə formalaşdığı təsərrüfat hesab edilir. Bu baxımdan Cəlilabad rayonunun Göytəpə şəhərində yaşayan sahibkar İdris Əliyevin üzüm və çiyələk bağında aqroturizm fermer təsərrüfatının yaradılması üçün işlər görülüb.
Layihənin ilk mərhələsində layihə əməkdaşları tərəfindən sahibkarın bu sahədəki bilik və bacarıqlarını artırmaq yönümündə müxtəlif təlim və tədbirlər təşkil edilib, Aqroturizm Nümayiş Fermer Təsərrüfatının tanıdılması üçün sosial çarxın çəkilişi həyata keçirilib.
Aqroturizm fermer təsərrüfatına gələn turistlər burada üzüm dərmək, çiyələk yığmaq, bağda gəzinti, velosiped sürmək, piknik qurmaq və sair bu kimi aqroturizm fəaliyyətlərinə onların cəlb edilməsi üçün imkanlar təhlil edilib, tövsiyələr verilib.
Qeyd edək ki, layihə ölkəmizin şimal və cənub regionunda ümumilikdə 8 rayonunu əhatə edir. Aqroturizm Nümayiş Fermer Təsərrüfatlarının eyni qaydada Cəlilabad rayonundan başqa, Lənkəran, Salyan, Quba, Qusar, Xaçmaz, Siyəzən və Şabran rayonunda da yaradılması nəzərdə tutulub.