İQTİSADİYYAT
Cənub qaz dəhlizi Məşvərət Şurasının ikinci iclasında yüksək vəzifəli şəxslər iştirak edəcəklər
Bakı, 26 fevral, AZƏRTAC
Xəbər verdiyimiz kimi, fevralın 29-da Bakıda Cənub qaz dəhlizi Məşvərət Şurasının ikinci iclası keçiriləcək.
Energetika Nazirliyindən AZƏRTAC-a bildirilib ki, iclasda Türkiyənin energetika və təbii sərvətlər naziri Berat Albayrak, Gürcüstanın Baş nazirinin müavini, energetika naziri Kaxa Kaladze, Yunanıstanın məhsuldar istehsal, ətraf mühit və enerji naziri Panos Skurletis, Albaniyanın energetika və sənaye naziri Damian Gjiknuri, Bolqarıstanın energetika naziri Temenujka Petkova, İtaliyanın iqtisadi inkişaf naziri Federika Quidi, bu ölkənin iqtisadi inkişaf nazirinin müavini Klaudio de Vinsenti, Monteneqronun iqtisadiyyat naziri Vladimir Kavariç, ABŞ Dövlət Departamentinin enerji ehtiyatları bürosunun xüsusi nümayəndəsi Amos Hoçsteyn, Serbiyanın dağ sənayesi və energetika naziri Aleksandr Antiç, Xorvatiyanın iqtisadiyyat naziri İvan Vrdolyak və başqaları iştirak edəcəklər. Avropa İttifaqının (Aİ) xarici əlaqələr və təhlükəsizlik siyasəti üzrə ali nümayəndəsi Federika Mogerini və Avropa Komissiyasının enerji birliyi üzrə vitse-prezidenti Maroş Şevçoviç də iclasa qatılacaqlar.
Məşvərət Şurasının ikinci iclasına, həmçinin Avropa Yenidənqurma və İnkişaf Bankının (AYİB) prezidenti Suma Çakrabarti, AYİB-in enerji və təbii ehtiyatlar üzrə icraçı direktoru Rikkardo Puliti, Dünya Bankının prezidenti Cim Yon Kim, Dünya Bankının Avropa və Mərkəzi Asiya üzrə yeni təyin olunmuş vitse-prezidenti Siril Müller, Asiya İnkişaf Bankının (AİB) prezidenti Takehiko Nakao, AİB-in özəl sektordakı əməliyyatlar üzrə baş direktoru Tod Frilənd, Beynəlxalq Maliyyə Korporasiyasının (BMK) icraçı vitse-prezidenti vəzifəsini və baş icraçı direktorunun səlahiyyətlərini müvəqqəti icra edən Efiopis Tafara, Avropa İnvestisiya Bankının (AİB) prezidenti Verner Hoyer, AİB-in Cənubi Qafqaz üzrə vitse-prezidenti Laslo Baranya, TANAP-ın baş direktoru Saltuk Düzyol və TAP-ın icraçı direktoru Yan Bradşou da dəvət edilib.
İclas üç plenar sessiya və “dəyirmi masa”dan ibarət olacaq. Tədbirin yekununda Cənub qaz dəhlizi Məşvərət Şurası çərçivəsində nazirlərin görüşünün iştirakçıları tərəfindən birgə bəyanat imzalanacaq.
“Cənub Qaz Dəhlizi” layihəsinin reallaşdırılmasında regionda bütün iri layihələrin təşəbbüskarı olan Azərbaycanın siyasi iradəsi əhəmiyyətli rol oynayır. Bu layihə yeni qaz tədarükü mənbələrinin şaxələndirilməsinə və alternativ marşrutlar açmağa imkanlar yaradır. Ona görə də “Cənub Qaz Dəhlizi” layihəsinin reallaşdırılması dünya ölkələrinin diqqət mərkəzində olmaqla yanaşı, yaranmış yeni vəziyyətdə layihəyə cəlb edilmiş ölkələrin əlaqələndirilmiş fəaliyyətini zəruri edir. Bu baxımdan, Məşvərət Şurasının ikinci iclası dünyada baş verən iqtisadi böhran, neftin qiymətinin kəskin düşməsi ilə müşayiət olunan yeni iqtisadi vəziyyətin “Cənub Qaz Dəhlizi” layihəsinə təsirlərinin, beynəlxalq maliyyə təşkilatlarının iştirakı ilə maliyyələşmə məsələlərinin və sair müzakirəsinə şərait yaradacaq.
Eyni zamanda, ötən bir il ərzində layihənin həyata keçirilməsi istiqamətində görülən işlər diqqətə çatdırılacaq, layihənin hər bir hissəsi barədə hesabatlar təqdim olunacaq və növbəti tədbirlər birgə müəyyənləşdiriləcək. ABŞ və Avropanın tədbirdə yüksək statusda təmsil olunması bu nəhəng layihəyə diqqətin göstəricisi olmaqla yanaşı, həm də siyasi dəstəyi də təmin edəcək. Məşvərət Şurasının budəfəki iclası həm də TAP layihəsinin reallaşdırılmasında qarşıya çıxan çətinliklərin, fikir ayrılıqlarının aradan qaldırılmasına töhfə verəcək.
Xatırladaq ki, müvafiq layihənin həyata keçirilməsi üçün cəlb edilmiş ölkələrin enerji nazirlərindən ibarət Məşvərət Şurasının yaradılması təşəbbüsü bu layihənin strateji əhəmiyyətini yüksək qiymətləndirən, eyni zamanda, onun enerji sahəsindəki əməkdaşlığı daha da dərinləşdirməsi perspektivlərinə böyük önəm verən Azərbaycan Prezidenti İlham Əliyev tərəfindən irəli sürülüb. Məşvərət Şurasının işinin təşkili ilə bağlı məsələlərin icrası isə Azərbaycan Respublikasının Energetika Nazirliyinə tapşırılıb. Cənub qaz dəhlizi Məşvərət Şurasının ilk iclası keçən il fevralın 12-də Bakıda keçirilib.