ÇİLİNGƏR ELTAY ƏLİYEVİN ÇIXIŞI
Hörmətli qonaqlar, xanımlar və cənablar!
Biz çoxdan arzuladığımız ən xoş günə yığışmışıq. Zavodumuza ümummilli liderimiz Heydər Əliyevin adının verildiyi və abidəsinin açıldığı bir gündə toplaşmışıq. Bu açılışda ümummilli liderimizin layiqli davamçısı, cənab Prezidentimiz İlham Əliyev də iştirak edir. Buna görə ona minnətdarlığımızı bildirir və “ Xoş gəlmisiniz!” deyirik.
Mən 25 ildən artıqdır ki, bu zavodda çalışıram. Ümummilli liderimiz Heydər Əliyevin zavodumuzun yenidən qurulmasında və inkişafında böyük xidmətləri olmuşdur. Mən bunların canlı şahidiyəm. Onun müəssisəmizə gəlişini, fəhlələrlə görüşünü hər birimiz böyük məmnunluqla xatırlayırıq. Hər gəlişində o, yeni qurğunun istifadəyə verilməsində iştirak edər, fəhlələrlə səmimi görüşüb onların qayğıları ilə maraqlanar, öz tövsiyələrini verərdi. Biz indi də həmin tövsiyələri yerinə yetiririk. Möhtərəm Heydər Əliyev o vaxtkı İttifaq rəhbərlərini də zavodumuza dəvət edərdi və onlar müəssisəmizin fəaliyyəti ilə yaxından tanış olardılar. Bu, onun bizə olan inamından irəli gəlirdi.
2003-cü ildə, zavodumuzun 50 illik yubileyi ərəfəsində biz Heydər Əliyevin müəssisəmizə gəlişinə hazırlıq görmüşdük. Əfsuslar olsun ki, səhhəti ilə əlaqədar o, müəssisəmizə gələ bilmədi. Lakin ümummilli liderimiz bizi yaddan çıxarmadı, müəssisəmizə təbrik məktubu göndərdi. Televiziya ilə təbrik məktubu oxunarkən sevincimiz yerə-göyə sığmırdı. Zavodun 31 işçisinə orden və medalların verilməsi bizim sevincimizə səbəb oldu. Çox şadam ki, onların arasında mən də varam. Bu, bir daha göstərir ki, möhtərəm Heydər Əliyev bizim zavodun kollektivinə həmişə böyük diqqət və qayğı ilə yanaşmışdır.
Cənab Prezident, kollektivimiz Sizə söz verir ki, ümummilli liderimiz Heydər Əliyevin adını həmişə uca tutacaq, öz əməyimizlə onun adına layiq olacağıq. Ümummilli liderimizin banisi olduğu neft strategiyasının həyata keçirilməsində səylərimizi əsirgəməyəcəyik.
X X X
Azərbaycan Prezidenti İlham Əliyev təntənəli mərasimdə nitq söylədi.
Bölmənin digər xəbərləri
