ÇİNDƏ 8 RƏQƏMİNİ SEVİRLƏR
Rəqəmlər barədə Pifaqor elmində olduğu kimi, Çində də hər rəqəmin mənası var. Əgər onlar Olimpiadanı 2008-ci ilin isti, əvəzində səkkizinci ayında keçirməyi, ümumdünya oyunlarına avqustun səkkizində axşam saat 8-də start verməyi qərara almışlarsa, deməli, 8 rəqəmi yerli vətəndaşlar üçün, həqiqətən, uğurlu rəqəmdir.
8 rəqəmi Çin dilinin Kanton ləhcəsində “inkişaf”, “pul” və “status” deməkdir. Odur ki, 8 rəqəmi nə qədər çox olarsa, bir o qədər yaxşıdır. Əbəs deyil ki, avtomobilin xoşbəxt səkkizlərdən ibarət qeydiyyat nömrəsi üçün bir çinli 1990-cı ildə Honkonq hərracında 5 milyon Honkonq dolları və ya 641 min ABŞ dolları ödəmişdir. 135 8585 8585 telefon nömrəsində də çinlilər üçün “dördqat varlı olmaq arzusu” səslənmişdir. Bu nömrə də yerli hərracların birində 1 milyon dollara satılmışdır.
Amma çinlilər 4 rəqəmini qətiyyən xoşlamırlar. “Dörd” və “ölüm” sözləri onların dilində eyni cür səslənir, xoşagəlməz assosiasiya, paralellik və qaranlıq duyğusu buradan yaranır. Buna görə Çində evlərdə 4-cü və 14-cü mərtəbələr yoxdur və əgər orada Qərb ölkələrinin nümayəndələri yaşayacaqlarsa, 13-cü mərtəbədə olmur.
Bölmənin digər xəbərləri
