ÇİNDƏ AY TƏQVİMİ ÜZRƏ YENİ İL BAŞLANIR
Bayram gecəsi ailə üzvləri nemətlərlə dolu süfrə arxasına toplaşır, məşhur artistlərin televizorda çıxışlarını izləyir, söhbət edir, müxtəlif oyunlarla məşğul olurlar. Bir çox ailələrdə gənclər səhərədək yatmır, Yeni ilin gəlişini gözləyirlər. Bayram günü isə qızıl və gümüş külçələri xatırladan, firavanlığı xarakterizə edən düşbərə hazırlanır. Çinlilər qohumlarının və yaxınlarının evlərinə gedir, onların bayramını təbrik edir, xoş arzularını bildirirlər. Yeni ilin ilk günü qohumlara və yaxınlara hədiyyələr vermək ənənə halını almışdır. Uşaqlara qırmızı kağıza bükülmüş xırda pul paylanır.
Bayram günləri kütləvi tamaşalar təşkil edilir. Qədim dövrlərdə bayram təntənələri bir aydan çox çəkirdi. Hazırda isə Yeni il bayramı bir həftə davam edir. Əvvəllər çinlilər bayram günlərində bir-birinə siqaret, spirtli içkilər, ərzaq məhsulları hədiyyə edirdilər. İndi onları tər çiçəklər, idman klubuna giriş bileti, lotereya biletləri əvəz etmişdir. Dostlara və qohumlara təbrik açıqcaları, internet vasitəsilə elektron məktublar göndərilir.
Yeni il şənliklərindən sonra çinlilər digər ənənəvi bayramı - “Yuansyao”, yəni Fənərlər bayramını qeyd edəcəklər. Elə bu bayramla da Çində Yeni il şənlikləri başa çatacaqdır.