ÇİNDƏ ZƏLZƏLƏ OLMUŞDUR
AZƏRTAC RİA Novosti agentliyinə istinadla xəbər verir ki, iyunun 3-də səhər saat 5:34 (Bakı vaxtı ilə 1:34) dəqiqədə Çin Xalq Respublikasının (ÇXR) cənub-qərbindəki Yunnan əyalətinin Puer şəhərində zəlzələ baş vermişdir. Rixter cədvəli ilə 6,4 bal gücünə malik zəlzələnin episentri 23 dərəcə şimal en, 101,1 dərəcə şərq uzunluq dairəsindədir. İnzibati cəhətdən Puerin tabeliyində olan Hani şəhəri və Ningyer milli muxtar qəzası daha çox zərər çəkmişdir.
Verilən məlumatlara görə, 2 nəfər həlak olmuş, 15 nəfər ağır, 192 nəfər yüngül yaralanmışdır. Xeyli ev dağılmış, yollara və telekommunikasiya şəbəkələrinə daha çox ziyan dəymişdir. Əhalinin su və elektrik enerjisi ilə təminatı pozulmuşdur.
ÇXR Dövlət Seysmoloji İdarəsindən bildirmişlər ki, Pekindən təbii fəlakət ərazisinə iki xilasetmə qrupu göndərilmişdir, fövqəladə bərpa işləri aparılır. Puero hökuməti zərərçəkmiş rayonlara 132 min ABŞ dolları məbləğində yardım ayırmış, oraya çadır və adyallar, geyim əşyaları göndərmişdir. İlkin məlumata görə, təcili olaraq təqribən 120 min nəfəri köçürmək lazım gələcəkdir.
Xatırladaq ki, Puer ölkənin köhnə və tanınmış turist şəhərlərindən biridir.
Bölmənin digər xəbərləri
