CORC BUŞ KONDOLİZA RAYSA İCAZƏ VERİR
ABŞ-ın dövlət katibi Kondoliza Rays İranın xarici işlər naziri Mənuçehr Mottəki ilə görüşə bilər. AZƏRTAC xəbər verir ki, bunu ABŞ Prezidenti Corc Buş bildirmişdir. Doğrudur, tərəflər İranın nüvə proqramını müzakirə etməyəcəklər.
C.Buş Pi-Bi-Es dövlət teleşirkətinə müsahibəsində demişdir ki, görüş mayda Misirdə keçiriləcək İraqla bağlı beynəlxalq konfrans çərçivəsində baş tuta bilər. Prezident aparıcının “ABŞ diplomatiyasının başçısı iranlı həmkarı ilə ikitərəfli danışıqlar apara bilərmi?” sualına cavabında demişdir: “Bunu edə bilərlər”. Lakin eyni zamanda demişdir ki, müzakirə mövzusu yalnız konfrans çərçivəsində İraqla bağlı məsələlər ola bilər.
“İnterfaks” agentliyi isə ABŞ Prezidentinin bu sözlərini sitat gətirmişdir: “Mən beynəlxalq birliyin etimadını qazanmaqda İraq hökumətinə kömək edəcək regional konfransa nümayəndələrimizi göndərməkdən çox şadam. Lakin iranlılarla ikitərəfli danışıqlara başlamağa hazır deyiləm”.
Assoşieyted Press Agentliyinin yaydığı məlumata görə, İranın konfransda iştirak edib-etməyəcəyi hələlik aydın deyildir.
Bölmənin digər xəbərləri
