CORC VƏ LORA BUŞ DALLASDA EV ALMIŞLAR
AZƏRTAC xəbər verir ki, ABŞ Prezidenti Corc Buş və onun xanımı Lora Buş Dallasda (Texas ştatı) ev almışlar və Ağ evin indiki sahibinin səlahiyyət müddəti başa çatandan sonra gələn il yanvarın 20-də oraya köçəcəklər. Bunu Amerikanın birinci xanımının mətbuat katibi Selli Makdonaq bildirmişdir.
Xanım Makdonaq demişdir: “Prezident və onun xanımı Dallasın “Preston hollou” rayonunda yerləşən evə köçəcəklər. Onlar həm də asudə vaxtlarını Krouford yaxınlığında (Texas ştatı) özlərinə məxsus “Preri-Çepl” rançosunda keçirməkdə davam edəcəklər. Mətbuat katibi ər-arvadın hələ yeni mənzilə köçmədiyini bəhanə edərək bildirmişdir ki, digər təfərrüat açıqlanmayacaqdır.
Buna baxmayaraq, şəhərin aparıcı nəşri “Dallas morninq nyus” qəzeti artıq ABŞ -ın 43-cü prezidentinin gələcək yaşayış yerinin güman edilən ünvanını yaymışdır. Qəzetin məlumatına görə, bu il dekabrın 3-də Buşun şəxsi mühasibi onun vəkili hüququnda “Preston hollou”da 2,1 milyon dollara yaşayış sahəsi 790 kvadratmetr olan birmərtəbəli ev almışdır. Evdə dörd yataq otağı, qulluqçular üçün otaqlar, ayrıca qaraj və anbar binası var. Sənədlərə əsasən, bina 1959-cu ildə tikilmiş və o vaxtdan bəri xeyli təzələnmişdir.
Bölmənin digər xəbərləri
