DAĞISTANIN XASAVYURD ŞƏHƏRİNDƏ PARTLAYIŞ
AZƏRTAC-ın Mahaçqaladan aldığı xəbərdə deyilir ki, Dağıstanın Xasavyurd şəhərində partlayış nəticəsində üç nəfər həlak olmuşdur. Dağıstan Daxili İşlər Nazirliyi mətbuat xidmətinin məlumatına görə, şəhər milis şöbəsinin qarşısında dayanmış “Jiquli” avtomobili partlamışdır. Avtomobilin yanından keçən bir qadın və 4 yaşlı uşaq hadisə yerindəcə həlak olmuş, şəhər milis şöbəsinin müəssisədənkənar mühafizə bölməsinin rəisi Daytbəy Vəzirxanov isə aldığı yaralardan bir qədər sonra keçinmişdir. İlkin məlumata görə, 20-dək adam yaralanmışdır.
Partladılan həmin maşın hüquq mühafizə orqanlarının əməkdaşlarından birinə məxsus idi. O, partlayış törədilməzdən 10 dəqiqə əvvəl milis şöbəsinin binasına daxil olmuşdur.
Hadisə yerində əməliyyat-istintaq briqadası işləyir.
Bölmənin digər xəbərləri
