SİYASƏT
“Dağlıq Qarabağ və Türkiyə-Azərbaycan əlaqələrinin gələcəyi” mövzusunda vebinar keçirilib
Bakı, 2 oktyabr, AZƏRTAC
Oktyabrın 2-sində Türkiyə Xarici İşlər Nazirliyinin Strateji Araşdırmalar Mərkəzi və Beynəlxalq Münasibətlərin Təhlili Mərkəzinin birgə təşkilatçılğı ilə “Dağlıq Qarabağ və Türkiyə-Azərbaycan əlaqələrinin gələcəyi” mövzusunda vebinar keçirilib.
Beynəlxalq Münasibətlərin Təhlili Mərkəzindən AZƏRTAC-a bildiriblər ki, Türkiyənin Xarici İşlər nazirinin müavini Yavuz Selim Kıran sentyabrın 27-də Ermənistan tərəfindən başladılan hücuma qarşı Azərbaycanın güclü müdafiə olunmasını və həyata keçirdiyi uğurlu əks-hücum əməliyyatlarını Türkiyənin qürurla izlədiyini qeyd edib. Bildirilib ki, Türkiyə Azərbaycan tərəfinin ATƏT-in Minsk qrupunun danışıqlar prosesində uğursuzluğu ilə bağlı mövqeyini tamamilə dəstəkləyir və işğalçı ilə işğala məruz qalana qarşı eyni yanaşmanı qəbuledilməz hesab edir. Nazir müavini qeyd edib ki, Türkiyənin Azərbaycana qeyd-şərtsiz dəstəyinin davam edəcəyinə heç kimin şübhəsi olmasın. O, Ermənistana işğal etdiyi torpaqlardan çəkilmək və onu əsl sahibinə qaytarmaq çağırışı edib.
Türkiyə Xarici İşlər Nazirliyinin Strateji Araşdırmalar Mərkəzinin direktoru Ufuk Ulutaş beynəlxalq hüququn Azərbaycanın yanında olduğunu, Türkiyə və Azərbaycan dövlətləri arasında əməkdaşlığın Dağlıq Qarabağın azad olunmasına gətirib çıxaracağına inamını ifadə edib.
Beynəlxalq Münasibətlərin Təhlili Mərkəzinin İdarə Heyətinin sədri Fərid Şəfiyev BMT tərəfindən qəbul edilən dörd qətnamə, Avropa İnsan Haqları Məhkəməsində “Çıraqov və başqaları Ermənistana qarşı” işi və digər beynəlxalq təşkilatlar tərəfindən qəbul olunmuş sənədlərə toxunaraq beynəlxalq hüquqa əsasən Ermənistanın işğalçı dövlət kimi tanındığını əsaslandırıb.
Bəzi böyük dövlətlərin və təşkilatların hazırda davam edən hərbi əməliyyatların dayandırılması və sülh danışıqlarının bərpa edilməsi ilə bağlı çağırışlarına münasibət bildirən F.Şəfiyev deyib ki, Ermənistanın ATƏT-in Minsk qrupunun rəhbərliyi altında aparılan danışıqlar və qəbul edilmiş Madrid prinsiplərinin icrasından müxtəlif bəhanələrlə imtina etməsi, danışıqlar prosesinin formatını dəyişdirərək üçüncü tərəfi cəlb etmək cəhdləri, habelə iyul ayında danışıqların bərpası üçün yeddi şərt irəli sürməsi bunu mümkünsüz hala gətirib. Qeyd edilib ki, hazırda Azərbaycan BMT Nizamnaməsinin 51-ci maddəsinə müvafiq olaraq özünümüdafiə tədbirləri həyata keçirir.
F.Şəfiyev, həmçinin bildirib ki, son dövrlərdə Nikol Paşinyanın hərbi ritorikası yalnız Azərbaycana qarşı olmaqla kifayətlənməyib, Türkiyə dövlətinə qarşı da yönələrək heç bir hüquqi əsası olmayan Sevr Anlaşmasında nəzərdə tutulan ərazilərə iddialar irəli sürüb.
EDAM Təhlükəsizlik və Müdafiə Araşdırmaları Proqram direktoru Can Kasapoğlu münaqişənin hərbi tərəflərindən bəhs edərək sərhədlərin güc yolu ilə dəyişdirilə bilməməsi prinsipinin digər ölkələrə tətbiq olunduğu kimi, Ermənistana da tətbiqinin Azərbaycana öz ərazilərini hərbi yolla işğaldan azad etməkdən başqa yol buraxmadığını bildirib. O, son dövrlər Türkiyə ilə Azərbaycan arasında hərbi tərəfdaşlığın silah satmaqdan konsepsiya transferinə qədər irəlilədiyini qeyd edib və iki ölkənin ortaq zabitlər nəslinin yetişdirilməsinin vacibliyinə toxunub.
Qafqaz Beynəlxalq Münasibətlər və Strateji Araşdırmalar Mərkəzinin (QAFSAM) sədri Araz Aslanlı danışıqlar prosesinin dayanmasına gətirib çıxaran hadisələrin xronologiyasına nəzər salıb, həmçinin Azərbaycan-Türkiyə münasibətlərinin münaqişənin həllinə təsir imkanlarından bəhs edib.
SETA Təhlükəsizlik Araşdırmaları Direktoru Murat Yeşiltaş hazırda davam edən hərbi əməliyyatların niyə məhz sentyabrın 27-də başladığını analiz edərək bildirib ki, bu, iyulun 12-də ermənilərin Tovuza hücumu, eyni zamanda, Liviya, Suriya, Aralıq dənizi regionunda baş verən geosiyasi hadisələr ilə üzvi sürətdə bağlı olub. Azərbaycanın artan hərbi gücünə toxunan Murat Yeşiltaş deyib: “Azərbaycan Ordusu artıq NATO standartlarına cavab verən silahlı qüvvələrə çevrilib”.