REGİONLAR
Daha 24 ailə Füzulidə məskunlaşıb
Füzuli, 21 avqust, Aydın Yavərzadə, AZƏRTAC
Bildiyimiz kimi, iyirmi yeddi il erməni işğalında qalan və xarabalığa çevrilən Füzuli Azərbaycan Ordusunun 2020-ci ilin sentyabrında başlayan 44 günlük Zəfər yürüşü zamanı azadlığına qovuşub. İşğal dönəmində ermənilərin hərbi məqsədlər üçün bufer kimi istifadə etdiyi Füzuli torpaqları məhz azad edildikdən sonra dövlətimiz tərəfindən yenidən qurulmağa başlayıb. Ermənilərin müxtəlif tipli minalarla çirkləndirdiyi ərazilər təmizlənərək tikinti quruculuq işlərinə start verilib. Qısa zaman kəsiyində abadlaşan Füzuli indi öz doğma sakinlərini qarşılayır. Otuz il yurd həsrəti ilə yaşayan Füzuli sakinlərinin doğma yurda qayıdışı davam edir.
AZƏRTAC-ın bölgə müxbiri xəbər verir ki, avqustun 21-də Füzuliyə yola salınan ikinci köç karvanı ünvanına çatıb və 24 ailə olmaqla daha 68 nəfər Füzuli sakini doğma yurdda yaşamağa başlayıb. Füzuli şəhərinə çatan ailələr Qaçqınların və Məcburi Köçkünlərin İşləri üzrə Dövlət Komitəsinin, Qarabağ iqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Azərbaycan Respublikası Prezidentinin Xüsusi Nümayəndəliyinin əməkdaşları tərəfindən böyük coşqu ilə qarşılanıb. Füzuli sakinləri hərtərəfli dövlət qayğısı ilə əhatə olunduqlarına görə Prezident, Müzəffər Ali Baş Komandan İlham Əliyevə, Birinci vitse-prezident Mehriban xanım Əliyevaya, torpaqlarımızı işğaldan qurtaran rəşadətli Azərbaycan Ordusuna, qəhrəman əsgər və zabitlərimizə minnətdarlıqlarını ifadə ediblər. Daha sonra ailələr öz mənzillərinin açarlarını sevinc hissi ilə təhvil alıb. Bununla da Füzuli şəhərində 47 ailənin, yəni 158 nəfərin daimi məskunlaşması təmin edilib.
Qeyd edək ki, evlərin bölgüsü məcburi köçkünlərə yeni yaşayış sahələrinin verilməsinin hazırda qüvvədə olan qaydaları əsasında, şəffaflıq və ədalətlilik prinsipləri əsasında püşkatma ilə aparılıb. Püşkatma avqustun 5-də Dövlət Komitəsinin Repatriasiya Departamentində keçirilib. Püşkatmada 144 ailə (509 nəfər) iştirak edib. Ailə tərkibinə uyğun olaraq, onlardan 51-i ikiotaqlı, 76-sı üçotaqlı, 17-si dördotaqlı mənzillə təmin olunub. Qarşıdakı günlərdə Füzuli şəhərinə ailələrin köçürülməsi davam edəcək.