SİYASƏT
DAHİ HEYDƏR ƏLİYEVƏ VƏTƏNİMİZDƏN UZAQLARDA DA DƏRİN HÖRMƏT, SONSUZ EHTİRAM BƏSLƏYİRLƏR
Bakı, 12 dekabr (AZƏRTAC). Zaman hər dərdin məlhəmidir, deyirlər. İnsan həyatda çox əziz, doğma adamını itirəndə ona elə gəlir ki, dünya artıq bitdi, tükəndi və o, daha yaşaya bilməyəcəkdir. Onu ovundurmaq, sakitləşdirmək cəhdləri də əbəs olur. Yalnız zamanın çəkdiyi sığal mənəvi cəhətdən sarsılan insanların dərdini bir qədər unutdura bilir. Lakin təkcə evdən deyil, eldən gedən insanlar ki var, onların hüznü xalqın böyük kədəridir. Tarixdə elə şəxsiyyətlər olub ki, onların cismani yoxluğu böyük matəmə, kədərə çevrilmişdir. Lakin bu dahi insanlar əslində öz bioloji ölümləri ilə əbədiyyət ömrü qazanıblar. Zəmanəmizin, çox yaxın tariximizin görkəmli şəxsiyyətlərindən biri olan dahi Heydər Əliyevin əbədiyaşarlıq qazanmış xatirəsi də əsrlər boyu yaddaşlarda yaşayacaq və onun gördüyü işlər öz dəyərini qoruyub saxlayacaqdır.
Ulu öndərimizin vaxtı ilə görüşdüyü adamların xatirələrini dinləmək, gəzib dolandığı yerlərlə tanış olmaq bu gün bizdə kövrək duyğular oyadır. Doğulduğu Azərbaycanımızın ləli, gövhəri, ayrılmaz parçası olan doğma Naxçıvandan tutmuş, o dövrdə hakimiyyət olimpinin zirvəsi sayılan Kremldə ali vəzifədə çalışdığı zaman gəzib dolandığı yerlər bizim üçün əziz və unudulmazdır.
Vladiqafqazda müalicəvi mineral su sanatoriyaları çoxdur. Sayı 40-a çatan sanatoriyaların arasında Yesentukidəki Kalinin adına sanatoriya ərazisinin böyüklüyünə, zümrüd rəngli meşə çətirinə, füsunkar təbiətinə, bir də tarixi qədimliyinə, müalicə təsirlərinə görə onlardan çox fərqlənir. Hələ orta əsrlərdən rus çarları, müxtəlif ölkələrin zadəganları buraya dincəlməyə və müalicə almağa gələrmişlər.
Bu sanatoriyada hətta I Pyotr üçün taxtadan tikilmiş müalicə və istirahət evi bu gün də qorunub saxlanılır. Sovet dövründə isə Sov.İKP MK-nın balansında olan Kalinin adına sanatoriyada dövlət və hökumət rəhbərləri, bir sözlə, yalnız partiya elitası dincəlmək hüququna malik idi.
Heydər Əliyev də 70-80-ci illərdə Yesentukidə Kalinin adına sanatoriyada bir neçə dəfə istirahət etmişdir. Dahi öndərimiz orada ailə üzvləri ilə birlikdə dincələrmiş. Sovet İttifaqı dağıldıqdan sonra bu sanatoriyanın qapıları müalicəyə ehtiyacı olan hər kəsin üzünə açılmışdır.
Müalicə həkimim azərbaycanlı olduğumu biləndə stolunun siyirməsindən bir ağ-qara şəkil çıxarıb mənə göstərərək dedi: Bu şəklin böyüdülmüş variantını evdə qonaq otağının divarından asmışam. Bu şəkil mənə ona görə əzizdir ki, onu mərhum anam gənc yaşlarında görkəmli şəxsiyyət Heydər Əliyevin özü və ailəsi ilə birlikdə çəkdirib.
Rusiya Federasiyasının əməkdar həkimi Qalina Podqornaya söhbət əsnasında iftixar hissi ilə onu da dedi ki, Kalinin adına sanatoriya Heydər Əliyevin çox sevdiyi müalicə ocaqlarından idi. Həkim Podqornaya əlavə etdi ki, anam, RF-nin əməkdar həkimi Klavdiya Kozlova Heydər Əliyevin şəxsi müalicə həkimi olub. Anam evimizdə danışardı ki, Kunayevdən, Rəşidovdan, Şevardnadzedən fərqli olaraq Heydər Əliyev çox gülərüz, səmimi, daha mehriban idi. Həyat yoldaşı Zərifə xanım da, uşaqları da alicənab idilər.
Anam danışardı ki, Heydər Əliyev istirahət müddətində sanatoriyanın 50 hektarlıq ərazisini birər-birər gəzər, hər daşın, hər tikilinin tarixini öyrənməyə can atardı. Deyər, gülər, öz xalqı, Vətəni haqqında ürək dolusu, fəxrlə, qürurla söz salar və haqlı olaraq bununla öyünərdi. Anam onu da deyirdi ki, Heydər Əliyev tükənməz enerjili, fenomen yaddaşlı, klassik və müasir ədəbiyyatı, mədəniyyəti dərindən bilən, öz xalqını çox sevən və başqa xalqlara da böyük hörmətlə yanaşan şəxsiyyət idi. Bu dahi şəxsiyyətin həmin dövrdə ailəsi ilə birgə müalicə həkimi olan anamla çəkdirdiyi şəkil mənzilimizin divarından əziz xatirə kimi asılıb.
Həmin sanatoriyada 35 illik iş təcrübəsi olan, hazırda baş həkim işləyən, ulu öndərimizin ailəsi ilə birgə sanatoriyaya gəlişlərini yaxşı xatırlayan Valentina Petrova da söhbətə qoşulub əlavə etdi ki, Rusiyada Heydər Əliyevi çox sevirlər.
Valentina Alekseyevna dedi ki, Heydər Əliyev sözün əsl mənasında möhkəm iradəli, qətiyyətli, parlaq şəxsiyyət idi. Bütün rusiyalılar çox yaxşı xatırlayır ki, əgər Qorbaçov Heydər Əliyevi «politbüro»dan uzaqlaşdırmasaydı, öz çirkin iddialarını həyata keçirə bilməzdi. Heydər Əliyev sovet dövlətinin müdrik bir başçısı da ola bilərdi. Ancaq Kremldaxili çəkişmələr buna imkan vermədi. Sovetlər dağılandan sonra Rusiyaya da Heydər Əliyev kimi şəxsiyyət rəhbərlik etsəydi, bizim də iqtisadi qüdrətimiz daha güclü olardı. Rusiyanın hər bir güşəsində Heydər Əliyev bu gün də xatırlanır və sevilir.
Baş həkim dedi ki, həqiqətən də Azərbaycan xalqı xoşbəxt xalqdır ki, Heydər Əliyev kimi dahi şəxsiyyəti, ona böyük şərəf gətirən qüdrətli dövlət xadimi olub. Onun oğlu Prezident İlham Əliyev də atasına layiq bir davamçıdır. Sovet hakimiyyəti dağılandan sonra bəzi sahələrdə əlaqələr zəifləsə də, Kalinin adına sanatoriyaya gələn azərbaycanlılar çoxdur və şəxsi söhbətlərimiz zamanı bəlli olur ki, onlar hamılıqla dahi Heydər Əliyev siyasətini və bu siyasətin davamçısı Prezident İlham Əliyevin fəaliyyətini çox yüksək dəyərləndirirlər, onunla fəxr edirlər.
Bu söhbətləri dinlədikcə Vətəndən uzaqda qəlbimi sonsuz iftixar hissi doldururdu. Ulu öndərimizin vəfatının 6-cı ildönümü günündə Fəxri xiyabana ümummilli liderimizin məzarını ziyarətə gələn insan selini seyr etdikcə Yesentuki sanatoriyasının həkimlərinin söylədikləri xoş sözləri yada salıb qürur hissi ilə deyirdim: Dahi öndərimizə ümumxalq sevgisi tükənməzdir.
M.Əzizqızı
Əməkdar jurnalist