Daşkəsəndə alman irsi VİDEO
Daşkəsən, 28 avqust, Vüsalə Cənnətova, AZƏRTAC
AZƏRTAC-ın “Mən turist olsaydım” rubrikası: Daşkəsən rayonu.
Dağlar qoynunda yerləşən Daşkəsən istər yay, istərsə də qış fəslində turizm baxımından böyük imkanlara malik bölgələrdəndir. Burada ekoloji, xüsusən də qış turizminin inkişafı üçün böyük imkanlar mövcuddur.
Bu rayonun memarlığında alman irsinin də izləri görünür. İkinci Dünya müharibəsində əsir götürülən alman hərbçilərinin bir hissəsi Daşkəsənə gətirilərək burada mədənçilik, dəmir yolu tikintisi sahələrinə və şəhərin salınması işlərinə cəlb edilib. Rayon ərazisində alman irsinə aid memarlıq nümunələri bu günədək qorunub saxlanılır. Dəmir-filizi mədənlərinin istismarı ilə əlaqədar Bayan kəndi ərazisində “Bayan stansiyası 1946” yazısının olduğu lövhə, alman memarlıq üslubunda tikilmiş 3 dəmiryol körpüsü buna əyani misaldır. Belə ki, Daşkəsəndə çıxarılan dəmir filizinin daşınması üçün 1946-cı ildə Bayan, 1947-ci ildə Quşçu körpü dəmir yolu stansiyası inşa edilib. 1950-ci ildə uzunluğu 35 kilometr olan Quşçu-Alabaşlı dəmir yolu xətti tikilərək istifadəyə verilib. Gəncə-Daşkəsən-Xoşbulaq avtomobil yolu üzərindəki alman irsinə aid körpülər Qoşqarçayın gözəlliyi, dağların əzəməti ilə ahəng təşkil edərək, fərqli və maraqlı mənzərə yaradır.
Daşkəsən şəhərində alman memarlıq üslubunda tikilmiş 10-a yaxın çoxmərtəbəli yaşayış binasında bu gün də yerli sakinlər yaşayır. Bu binalar şəhərə xüsusi gözəllik qatır və alman memarlıq üslubunun yerli şəraitə uyğunlaşdırıldığını əks etdirir. Rayonun bəzi kəndlərində də almanlar tərəfindən tikilmiş evlər və binalar indiyədək qorunub saxlanılmaqdadır.
Tolerant ölkəmizin bir parçası olan Daşkəsəndə alman əsirlərinin xatirəsi hər zaman ehtiramla yad edilir. Şəhərdəki Daşkəsən qəsəbəsində alman əsirlərinin məzarlığı yerləşir. Daşkəsən rayonunda alman irsinin izləri həm yerli əhali, həm də turistlər üçün böyük maraq doğurur və Azərbaycanın zəngin mədəni müxtəlifliyinin bir nümunəsi kimi qiymətləndirilir.
Bölmənin digər xəbərləri
