“Dastanlaşmış şanlı Zəfər” - Folklor İnstitutunda tədbir
Bakı, 7 noyabr, AZƏRTAC
AMEA Folklor İnstitutunda 8 Noyabr - Zəfər Günü münasibətilə “Dastanlaşmış şanlı Zəfər” adlı tədbir keçirilib.
İnstitutdan AZƏRTAC-a bildirilib ki, tədbir iştirakçıları öncə Vətənimizin ərazi bütövlüyü və suverenliyi uğrunda şəhid olan qəhrəman övladların xatirəsini bir dəqiqəlik sükutla yad ediblər.
Folklor İnstitutunun baş direktoru akademik Muxtar Kazımoğlu-İmanov Zəfər Günü münasibətilə tədbir iştirakçılarını təbrik edib, 44 günlük Vətən müharibəsində əldə edilən şanlı Qələbənin əhəmiyyətindən danışıb. Akademik Dövlət Bayrağımızın artıq Xankəndi şəhərində dalğalanmasının qürurverici olduğunu, tarixi Zəfərin xalqın özünəqayıdışında böyük rol oynadığını diqqətə çatdırıb. Alim vurğulayıb ki, Müzəffər Ali Baş Komandan, Prezident İlham Əliyevin qətiyyəti, Azərbaycan Ordusunun əzmi sayəsində 44 günlük Vətən müharibəsində qazanılan şanlı Qələbə dövlətçilik tariximizin ən parlaq səhifələrindən biridir.
“Prezident İlham Əliyevin müdrik siyasəti, ordumuzun rəşadəti, xalqımızın əzm və iradə, birlik və həmrəylik nümayiş etdirərək “Dəmir yumruq” ətrafında sıx birləşməsi sayəsində əldə olunan bu Zəfər hər birimiz üçün sonsuz qürur mənbəyidir”, - deyə akademik vurğulayıb.
Sonra “Folklor” studiyasının Zəfər Günü münasibətilə hazırladığı videoçarx nümayiş olunub.
Tədbirdə qonaq qismində iştirak edən polkovnik-leytenant Tahir Məmmədov həm I Qarabağ savaşında, həm də 44 günlük Vətən müharibəsində keçdiyi döyüş yolundan söz açıb. Tahir Məmmədov qeyd edib ki, bu tarixi Qələbənin böyük əhəmiyyəti xalqımız tərəfindən həmişə yüksək qiymətləndiriləcək və heç vaxt unudulmayacaq. O, Zəfər Gününə həsr olunmuş belə bir tədbirə dəvət olunduğu üçün Folklor İnstitutunun rəhbərliyinə təşəkkürünü bildirib.
Qərbi Azərbaycan folkloru şöbəsinin aparıcı elmi işçisi filologiya üzrə fəlsəfə doktoru, 44 günlük Vətən müharibəsi şəhidi mayor Vüsal Vəliyevin qardaşı Əpoş Vəliyev 8 Noyabr - Zəfər Günü və 9 Noyabr - Dövlət Bayrağı Günü münasibətilə tədbir iştirakçılarını təbrik edib, bu gün qalib ölkənin vətəndaşı olduğu üçün çox qürur duyduğunu söyləyib.
İnstitutun Mifologiya şöbəsinin aparıcı elmi işçisi filologiya üzrə fəlsəfə doktoru, dosent, I Qarabağ müharibəsi veteranı Şakir Albalıyev çıxış edərək, tarixi Qələbənin əldə olunmasında Azərbaycan xalqının fədakarlığından, ölkəmizdə ordu quruculuğu istiqamətində görülən işlərdən bəhs edib. O bildirib ki, dövlətimizin nüfuzu və gələcək inkişafı baxımından müstəsna əhəmiyyət kəsb edən şanlı Zəfər Azərbaycan xalqının qürur günü kimi tarixə düşüb.
Bölmənin digər xəbərləri
