DƏLƏDUZLAR YAXALANMIŞLAR
Dələduzluqla məşğul olan Kazım Məmməd oğlu Əhmədov və polis serjantı Akif Dadaş oğlu Məmmədov Hacıqabul rayon sakini Həmidxan Mürvətovdan hədə-qorxu yolu ilə pul tələb edərkən Milli Təhlükəsizlik Nazirliyinin martın 26-da keçirdiyi əməliyyat tədbirləri nəticəsində yaxalanmışlar.
Müəyyənləşdirilmişdir ki, özünü “Milli Təhlükəsizlik Nazirliyinin əməkdaşı” kimi qələmə verərək, kriminal araşdırmalar aparan Kazım Əhmədov Akif Məmmədovla cinayət əlaqəsinə girərək zərərçəkən Həmidxan Mürvətovu ailə üzvlərinin oğurlanması, mənzilinin yandırılması, eləcə də soyuq silahla öldürülməsi ilə hədələmiş, ayrı-ayrı vaxtlarda böyük məbləğdə pulunu mənimsəmişlər.
Kazım Əhmədovun idarə etdiyi “Mersedes” markalı avtomobilə baxış zamanı oradan müxtəlif şirkətlərə aid möhür və blanklar, yerli və xarici ölkə vətəndaşlarına məxsus sənədlər, eləcə də onun guya, Əfqanıstan və Qarabağ Veteranları İttifaqı Xətai rayon bölməsinin sədr müavini olması barədə saxta vəsiqə aşkar edilmişdir. Bundan başqa, avtomobilin dövlət nömrə nişanının K.Əhmədovun qardaşına məxsus “Zil” markalı yük maşınına aid olması müəyyən edilmişdir.
Toplanmış materiallar aidiyyatı üzrə Respublika Prokurorluğuna göndərilmişdir. Faktla bağlı cinayət işi qaldırılmışdır.
MİLLİ TƏHLÜKƏSİZLİK NAZİRLİYİNİN
MƏTBUAT XİDMƏTİ
Bölmənin digər xəbərləri
