Bakı, 10 iyun (AZƏRTAC). Azərbaycan Dəmiryolçularının Müstəqil Həmkarlar İttifaqı Respublika Komitəsinin (MHİRK) növbəti - XII plenumu keçirilmişdir.

“Azərbaycan Dəmir Yolları” Qapalı Səhmdar Cəmiyyətinin (ADY QSC) mətbuat katibliyindən AZƏRTAC-a bildirmişlər ki, tədbirdə MHİRK-in sədri Fəzail Bağırov dəmir yolunda aparılan islahatlar, “Azərbaycan Respublikasında dəmir yolu nəqliyyat sisteminin 2010-2014-cü illərdə inkişafına dair Dövlət Proqramı”nın icrası istiqamətində görülən işlər, bütün bu işlərdə həmkarlar təşkilatlarının vəzifələri haqqında ətraflı məlumat vermişdir. Bildirmişdir ki, plenumda təşkilati və ADY QSC-nin tabeçiliyində olan idarə və müəssisələrdə ərizə və şikayətlərə baxılmasının ümumi vəziyyəti haqqında məsələlər müzakirə olunacaqdır.

Plenum üzvləri təşkilati məsələyə münasibət bildirəndən sonra MHİRK-in təşkilat şöbəsinin müdiri Samir Böyükzadə ADY QSC-nin tabeçiliyində olan idarə və müəssisələrdə ərizə və şikayətlərə baxılmasının ümumi vəziyyəti haqqında məsələ ilə bağlı məlumat vermişdir. Diqqətə çatdırmışdır ki, plenum olduqca əlamətdar hadisələrin qeyd olunduğu bir dövrə təsadüf edir. Dəmiryolçular may ayında xalqımızın ümummilli lideri Heydər Əliyevin anadan olmasının 88-ci ildönümünü, Azərbaycan Xalq Cümhuriyyətinin yaradılmasının 93 illiyini yüksək əhval-ruhiyyə ilə qeyd etmişlər.

İyun ayının 15-də isə xalqımız Milli Qurtuluş Gününü qeyd etməyə hazırlaşır. Ulu öndər Heydər Əliyevin 1993-cü ildə xalqın təkidli tələbi ilə hakimiyyətə qayıdışı ilə ölkəmizin parçalanmasının qarşısını almış, Azərbaycanın müstəqil və əbədi bir dövlət kimi formalaşmasına gətirib çıxarmışdır.

Ümummilli lider Heydər Əliyevin layiqli davamçısı Prezident İlham Əliyev tərəfindən aparılan məqsədyönlü işlər həmkarlar ittifaqlarını öz başlıca vəzifələrini - əməkçilərin sosial-iqtisadi mənafelərini, eyni zamanda Əmək Məcəlləsinin tələblərinə müvafiq qaydada qanunla təsbit olunmuş sosial hüquqlarını qorumaq vəzifəsini daha yaxşı yerinə yetirməyə əlverişli şərait yaradır.

Məruzəçi bildirmişdir ki, ADY QSC-nin aparatında, eyni zamanda cəmiyyətin tabeçiliyində olan bəzi departament və müəssisələrdə aparılmış yoxlama və araşdırmaların nəticələrinə görə, QSC-nin ərizə-şikayətlər bölməsinə 2010-cu ildə və cari ilin 5 ayında 1654 ərizə, müraciət və şikayət daxil olmuşdur. Onlardan 602-si cəmiyyətin sədrinə ünvanlanmış, qalan 1052 ərizə baxılmaq üçün müvafiq rəhbər işçilərə göndərilmişdir. Təqaüd, işə qəbul, təhsil haqqının ödənilməsi və digər məsələlərin həlli ilə əlaqədar 224 şikayət ərizəsinə cəmiyyətin müvafiq şöbələri tərəfindən baxılmış və əksəriyyəti müsbət həll edilmişdir. Ötən il və bu ilin 5 ayında MHİRK-ə 452 ərizə və şikayət daxil olmuşdur. Onlardan 359-na MHİRK-in aparat işçiləri tərəfindən baxılmış, qalan 93 ərizə baxılmaq üçün Birləşmiş və Azad Həmkarlar İttifaqı komitələrinə göndərilmişdir.

Sonra mövzu ətrafında müzakirələr aparılmış, nöqsan və çatışmazlıqların aradan qaldırılması barədə müvafiq tapşırıqlar verilmişdir.

Sonda MHİRK-in XII Plenumunun qərarı oxunmuşdur.