Donald Tramp bu gün Misirdə keçiriləcək İsrail-HƏMAS danışıqları ilə bağlı bəyanat verib
Bakı, 6 oktyabr, AZƏRTAC
ABŞ Prezidenti Donald Tramp bildirib ki, Qəzzada atəşkəs təklifi ilə bağlı HƏMAS ilə aparılan danışıqlar Misirdə oktyabrın 6-da keçiriləcək kritik görüş ərəfəsində sürətlə davam edir.
AZƏRTAC ABC telekanalının saytına istinadla xəbər verir ki, Tramp “Truth” sosial platformasında yazıb: “HƏMAS ilə bu həftə sonu girovları azad etmək, Qəzzada müharibəyə son qoymaq üçün çox müsbət müzakirələr aparıldı, lakin ən əsası, nəhayət, tərəflər Yaxın Şərqdə sülhə nail olmaq istədilər. Bu danışıqlar çox uğurlu olub və sürətlə davam edir. Texniki qruplar bazar ertəsi Misirdə yenidən bir araya gələrək yekun detalları dəqiqləşdirmək üçün görüşəcəklər. Mənə deyirlər ki, birinci mərhələ bu həftə başa çatmalıdır və hamıdan bu prosesdə sürətli hərəkət etməyi xahiş edirəm”.
ABŞ Prezidenti vəziyyəti izləməyə davam edəcəyini bildirib və vurğulayıb ki, “vaxtdan səmərəli istifadə olunmalıdır, yoxsa bunun ardınca kütləvi qan töküləcək”.
HƏMAS bazar günü səhər saatlarında Fələstin qrupunun mühacirətdə olan Qəzza rəhbəri Xəlil əl-Həyyanın başçılıq etdiyi nümayəndə heyətinin “atəşkəs mexanizmləri, İsrail qüvvələrinin çıxarılması və əsir mübadiləsi üzrə danışıqlara başlamaq üçün” Misirə gəldiyini açıqlayıb. O, səfərin müddəti və gündəliyin təfərrüatlarını dəqiqləşdirməyib.
İsrail daha əvvəl bildirmişdi ki, bir danışıq qrupu Trampın Qəzza planı çərçivəsində HƏMAS ilə dolayı yolla məhbus mübadiləsi danışıqları aparmaq üçün bazar ertəsi Misirin Qırmızı dənizdəki kurort şəhəri Şarm əl-Şeyxə yola düşəcək.
Sentyabrın 29-da Tramp fələstinli məhbuslar müqabilində bütün israilli girovların azad edilməsi, atəşkəs, HƏMAS-ın tərk-silah olunması və Qəzzanın yenidən qurulmasını əhatə edən 20 bəndlik planı açıqlayıb.
HƏMAS bu planla prinsipcə razılaşıb və növbəti addımlar üçün danışıqlar Misirdə aparılmalıdır.
Bölmənin digər xəbərləri
