İQTİSADİYYAT
Doqquz ayda Şəkidə məhsul buraxılışının həcmi 45,9 faiz artmışdır
Şəki, 2 noyabr (AZƏRTAC). Azərbaycan Prezidenti İlham Əliyevin sədrliyi ilə Nazirlər Kabinetinin 2011-ci ilin doqquz ayının sosial-iqtisadi inkişafının yekunlarına həsr olunmuş iclasında qarşıya qoyulan vəzifələr Şəki Şəhər İcra Hakimiyyətində keçirilən fəallar yığıncağında geniş müzakirə olunmuşdur.
AZƏRTAC xəbər verir ki, yığıncaqda şəhər icra hakimiyyətinin başçısı Elxan Usubovun ilin 9 ayında rayonda görülən işlər və qarşıda duran vəzifələrə dair məruzəsi dinlənilmişdir. Qeyd olunmuşdur ki, rayonda faktiki qiymətlərlə 256 milyon 656 min manatlıq məhsul buraxılmışdır. Bu, 2010-cu ilin müvafiq dövrü ilə müqayisədə 45,9 faiz çoxdur. Keçən ilin eyni dövrü ilə müqayisədə pərakəndə əmtəə dövriyyəsi 22,2 faiz artaraq 177 milyon 663 min manata, əhaliyə göstərilən pullu xidmətlərin həcmi 12,4 faiz artaraq 38 milyon 20 min manata çatmışdır. Rayonda 941 yeni iş yeri açılmışdır.
Məruzəçi bildirmişdir ki, bütün maliyyə mənbələri hesabına sosial-iqtisadi sahələrin inkişafına yönəldilmiş investisiyaların həcmi 46 milyon 80 min manat təşkil etmişdir. Bu, əvvəlki ilin müvafiq dövrü ilə müqayisədə 87,1 faiz çoxdur. Aşağı Küngüt və Oxud kəndlərinə təbii qazın verilməsi təmin edilmişdir. Cari ildə Baş Kəldək kəndində 180 yerlik yeni məktəb binası istifadəyə verilmişdir. Hazırda şəhərdəki 5 nömrəli tam orta məktəb üçün 320 yerlik yeni tədris korpusunun, Şorsu və Aşağı Layısqı kəndlərinin hər birində 360, Çələbixan qəsəbəsində isə 180 yerlik yeni məktəb binalarının tikintisi, habelə 22 nömrəli uşaq bağçasının əsaslı təmiri davam etdirilir.
Respublikanın ən iri taxılçılıq rayonu olan Şəkidə bu il payızlıq taxıl əkilmiş 70 min 446 hektar sahədən rekord miqdarda - 238 min 585 ton məhsul götürüldüyü diqqətə çatdırılmışdır.
Bu il sentyabrın 12-də Prezident İlham Əliyevin Şəki şəhərinin sosial-iqtisadi inkişafının sürətləndirilməsinə dair əlavə tədbirlər haqqında Sərəncam imzaladığını xatırladan icra hakimiyyətinin başçısı, həmin sənəddə şəhərin milli-memarlıq üslubunun qorunub saxlanması, turizm potensialının genişləndirilməsi, tarixi abidələrin bərpa olunması və s. vəzifələrin qarşıya qoyulduğunu, bu məqsədlə ilkin olaraq 5 milyon manat vəsaitin ayrıldığını diqqətə çatdırmışdır. Natiq indi əsas məqsədin sənəddə qarşıya qoyulan vəzifələrin uğurla yerinə yetirilməsini təmin etməkdən ibarət olduğunu qeyd etmişdir.
Diqqətə çatdırılmışdır ki, 2012-ci ildə dahi mütəfəkkir M.F.Axundzadənin anadan olmasının 200 illik yubileyi ilə əlaqədar təntənəli tədbirlərin keçiriləcəyini nəzərə alaraq, hazırda dramaturqun adını daşıyan mədəniyyət və istirahət parkında, şəhərin mərkəzində qoyulmuş büstünün ətrafında, ev muzeyində, Sabit Rəhman adına Şəki Dövlət Dram Teatrının qarşısındakı meydanda geniş abadlıq və yenidənqurma işlərinə başlanılmışdır. Eyni zamanda, Heydər Əliyev və M.Ə.Rəsulzadə prospektlərində, Salman Mümtaz küçəsində, “Yuxarı baş” tarix-memarlıq qoruğunun ərazisində, yeni tikilən 100 çarpayılıq xəstəxana binasına gedən yolun hər iki tərəfində, habelə şəhərin digər küçələrində abadlıq və yenidənqurma işləri yüksək sürətlə davam etdirilir.
Məruzədə, həmçinin əhalinin təbii qaz, elektrik enerjisi, içməli su və digər kommunal xidmətlərlə təminatının yaxşılaşdırılması sahəsində görülən işlər qeyd olunmuş, yol verilmiş nöqsanlara toxunulmuş, qarşıda duran vəzifələrdən bəhs edilmişdir.
Məruzə ətrafında çıxışlar olmuşdur.