Bakı, 18 may, AZƏRTAC

Azərbaycanda keçiriləcək birinci Avropa Oyunlarının başlanmasına çox az vaxt qalır. Hazırda bununla bağlı hazırlıq işləri yekun mərhələyə daxil olub. Bu möhtəşəm idman tədbiri ilə əlaqədar Nəqliyyat Nazirliyinin və onun strukturlarının üzərinə də məsul vəzifələr düşür. Nazirliyin Dövlət Avtomobil Nəqliyyatı Xidmətinin rəisi Hüseyn Salamov rəhbərlik etdiyi qurumun Oyunlara hazırlıq istiqamətində gördüyü tədbirlər barədə AZƏRTAC-a məlumat verərək deyib:

- Avropanın tarixində ilk dəfə keçirilən Oyunların ev sahibi kimi Azərbaycan paytaxtının seçilməsi təsadüfi deyil. Bu tarixi qərarın qəbul edilməsində, əlbəttə, ölkəmizin beynəlxalq nüfuzu həlledici rol oynayıb. Son illər ərzində Azərbaycan dünya miqyasında özünü dinamik inkişaf edən müasir, güclü ölkə kimi təqdim edə bilib və bu gün dünya miqyasında çox etibarlı tərəfdaş kimi tanınır.

Azərbaycan dövlət müstəqilliyinin bərpa etdikdən sonra xalqımızın ümummilli lideri Heydər Əliyevin uzaqgörən siyasəti sayəsində respublikamızda müstəqil dövlət quruculuğu və ölkəmizin sosial-iqtisadi inkişafı yolunda geniş miqyaslı işlər görülüb, yüksək nailiyyətlər əldə edilib. Prezident İlham Əliyevin rəhbərliyi ilə özünün keyfiyyətcə yeni inkişaf dövrünü yaşayan respublikamızda iqtisadiyyatın bütün sahələrində, o cümlədən nəqliyyat sektorunda möhtəşəm, bir çox hallarda regionda ilk dəfə tətbiq edilən, ən yeni texnologiyalara əsaslanan nəhəng layihələr həyata keçirilir.

“Bakı-2015” ilk Avropa Oyunları ilə əlaqədar Nəqliyyat Nazirliyinin üzərinə olduqca böyük məsuliyyət düşür. Oyunlara hazırlıq prosesində nazirlik bilavasitə ilk Avropa Oyunlarının Əməliyyat Komitəsi ilə birgə fəaliyyət göstərib və nəqliyyat-yol kompleksi üzrə öhdəsinə düşən işlərin tələb olunan səviyyədə, yüksək keyfiyyətlə yerinə yetirilməsinə çalışıb. Oyunların keçirilməsinə hazırlıq dövründə və keçirilmə müddətində Nəqliyyat Nazirliyi üzrə müəyyən edilmiş “Tədbirlər Planı”ndan irəli gələn vəzifə və funksiyaların həyata keçirilməsi istiqamətində nəqliyyat naziri Ziya Məmmədovun birbaşa rəhbərliyi ilə nazirliyin struktur bölmələri və qurumları tərəfindən zəruri tədbirlər həyata keçirilib. Avtomobil yolları, avtomobil nəqliyyatı, hava və dəmir yolları, Nəqliyyatı İntellektual İdarəetmə Mərkəzinin fəaliyyəti ilə bağlı iri miqyasda işlər görülüb.

Nəqliyyat parkı yenilənib, paytaxta yeni avtobuslar, taksi maşınları gətirilib, yeni yol qovşaqları istifadəyə verilib. Bir sözlə, Bakıda keçiriləcək birinci Avropa Oyunları ilə əlaqədar nəqliyyatın ahəngdar fəaliyyətinin, daşımaların təhlükəsizliyinin təmin edilməsinin və digər təşkilati məsələlərin əlaqələndirilməsi istiqamətində təxirəsalınmaz tədbirlər həyata keçirilib.

“Bakı-2015” birinci Avropa Oyunlarının iştirakçılarına və qonaqlarına nəqliyyat xidmətləri göstərəcək avtomobil sürücülərinin Nəqliyyat Nazirliyi tərəfindən hazırlanması da məhz görülmüş işlərin bir hissəsidir. Bu məqsədlə 1509 avtobus və 1917 taksi sürücüsünün siyahısı elektron və çap variantında hazırlanaraq Nəqliyyat Nazirliyinə və Avropa Oyunlarının Əməliyyat Komitəsinin nəqliyyat departamentinə təqdim olunub. Sürücülər barədə toplanılmış məlumatlar, aidiyyəti üzrə yoxlamaq üçün müvafiq orqanlara göndərilib. Sürücülər üçün təlimlərin birinci mərhələsi Atletlər kəndində keçirilib. Avtobus sürücüləri üçün təlimlərin birinci nəzəri mərhələsi Dövlət Avtomobil Nəqliyyatı Xidmətinin tədris-kurs kombinatının mütəxəssisləri tərəfindən 2015-ci il yanvarın 14-dən 28-dək, taksi sürücüləri üçün təlimlərin birinci nəzəri mərhələsi isə fevralın 5-dən 23-dək keçirilib. Təlimlərin bu mərhələsini 851 avtobus və 1393 taksi sürücüsü müvəffəqiyyətlə başa vurub.

Təlimlərin ikinci praktiki sürücülük mərhələsi 2015-ci il martın 27-dən aprelin 14-dək “Bakı Bus” şirkətinin sürücülük təlim mərkəzində keçirilib və 804 sürücü bu mərhələni başa vuraraq müvafiq sənədlər alıb. Taksi sürücüləri üçün təlimlərin ikinci mərhələsi isə 2015-ci il martın 27-dən aprelin 26-dək təşkil olunub. Həmin mərhələni isə 1258 sürücü keçib və onlarla müqavilə imzalanıb.

Hazırda Dövlət Avtomobil Nəqliyyatı Xidmətinin “Bakı Sərnişin və Yük Daşımalarının təşkili” MMC tərəfindən təlimlərin ikinci mərhələsini uğurla başa vuran avtobus və taksi sürücüləri ilə müqavilə bağlanıb, onlar üçün hazırlanan plastik maaş kartlarının paylanılmasına başlanılıb.

Birinci Avropa Oyunlarının yüksək səviyyədə təşkili, o cümlədən oyunlar zamanı nəqliyyat xidmətlərinin keyfiyyətinin artırılması məqsədilə həyata keçirilən tədbirlər davam etdirilir və Dövlət Avtomobil Nəqliyyatı Xidmət bu istiqamətdə üzərinə düşən vəzifələri layiqincə yerinə yetirmək əzmindədir.

Ümumiyyətlə, “Bakı-2015” ilk Avropa Oyunları Təşkilat Komitəsinin sədri, Azərbaycanın birinci xanımı Mehriban Əliyevanın birbaşa rəhbərliyi ilə oyunların keçirilməsinə hazırlıq prosesində müvafiq qurumlar qarşıya qoyulan vəzifələri yüksək səviyyədə həyata keçirməyə çalışıblar. Görülmüş irimiqyaslı işlərin həcminə əsaslanaraq deyə bilərik ki, Azərbaycan Avropa Oyunlarına ev sahibliyi etmək üzrə birinci olmaq vəzifəsinin öhdəsindən layiqincə gələcək. “Bakı-2015” Avropa Oyunlarının tarixinə Azərbaycanın və azərbaycanlıların qələbəsi kimi yazılacaq.

Azərbaycan Respublikanın sosial-iqtisadi inkişafında mühüm əhəmiyyət kəsb edən nəqliyyat sisteminin son illər ərzindəki fəaliyyəti bütövlükdə nəqliyyat sektorunun təkmilləşdirilməsinə, əhalinin və iqtisadiyyatın daşımalara olan tələbatının tam ödənilməsinə, həyata keçirilən islahatların bu sahənin işinin daha səmərəli təşkilinə yönələrək Nəqliyyat Nazirliyinin daim diqqət mərkəzində olub. Nəqliyyatın cari fəaliyyəti və xüsusən də qəbul olunmuş Dövlət Proqramları ilə müəyyən edilən tədbirlərin dəqiq icrası istiqamətində məqsədyönlü işlər görülür.

2003-cü ildən başlayaraq nəqliyyat sistemində köklü islahatlar, sürətli inkişaf və yüksəliş dövrü başlanıb. Ölkəmizdə müasir nəqliyyat sisteminin formalaşdırılması, normativ-hüquqi bazanın təkmilləşdirilməsi, daşımaların asanlaşdırılması, təhlükəsizliyin təmin edilməsi, bütövlükdə nəqliyyat xidmətinə olan tələbatın keyfiyyətlə ödənilməsi və xidmət səviyyəsinin yüksəldilməsi məqsədilə nəqliyyat-yol kompleksində icra olunan layihələr sürətlə davam etdirilib.

Nəqliyyat Nazirliyinin Dövlət Avtomobil Nəqliyyatı Xidmətinin də bu sahədə xüsusi fəaliyyəti var. Xidmət avtomobil nəqliyyatı sahəsində dövlət siyasətinin işlənib hazırlanmasında və bu sahədə normativ hüquqi tənzimləmənin həyata keçirilməsində iştirak edir, avtomobil nəqliyyatı ilə sərnişin və yük daşımalarının inkişafı sahəsində tədbirlər görür. Habelə beynəlxalq və ölkədaxili sərnişin və yük daşımalarını yerinə yetirən avtomobil nəqliyyatı subyektləri tərəfindən beynəlxalq norma və qaydalara, Azərbaycan Respublikasının normativ hüquqi aktlarına riayət olunmasına nəzarəti həyata keçirir, avtomobil nəqliyyatı ilə müntəzəm sərnişin daşımalarının təşkilini və bu sahədə dövlət sifarişinin formalaşdırılmasını təmin edir, avtomobil nəqliyyatı ilə daşımaların vahid norma və qaydalar əsasında təhlükəsiz yerinə yetirilməsi üçün qanunvericilikdə müəyyən edilmiş qaydada tədbirlər görür, qanunvericilikdə müəyyən edilmiş digər istiqamətlərdə fəaliyyət göstərir.

Son illər avtomobil nəqliyyatı ilə yük və sərnişin daşımalarının təhlükəsizliyi, daşımaların ekoloji norma və tələbləri təmin edən yeni texnologiyalar əsasında təşkili və xidmət səviyyəsinin yüksəldilməsi, avtomobil nəqliyyatı infrastrukturunun yeniləşdirilməsi istiqamətində işlər aparılıb, taksi minik avtomobilləri ilə sərnişin daşımaları xidmətinin səviyyəsinin yaxşılaşdırılması ilə bağlı görülən işlər davam etdirilib.

Azərbaycanda taksi minik avtomobilləri ilə sərnişin daşımalarının inkişaf etdirilməsi və müasir tələblər səviyyəsində tənzimlənməsi, taksi daşımalarının keyfiyyətinin və təhlükəsizliyinin yüksəldilməsi, bu sahədə effektiv iqtisadi şəraitin yaradılmasını təmin etmək qarşımızda duran əsas vəzifələrdən biridir. Bu məqsədlə Bakı şəhərində əhalinin avtomobil nəqliyyatı ilə daşımalara olan ehtiyacının təmin olunmasının təşkili, şəhərdaxili, şəhərətrafı avtobus sərnişin daşımalarının tənzimlənməsi, daşıma xidmətlərinin keyfiyyətinin yaxşılaşdırılması, avtobus, taksi və yük daşımaları xidmətlərini göstərən hüquqi və fiziki şəxslərlə qanunvericilikdə müəyyən olunmuş qaydada hüquqi münasibətlərin tənzimlənməsi üzrə nəzərdə tutulmuş tədbirlərin vaxtında və keyfiyyətlə yerinə yetirilməsi istiqamətində Dövlət Avtomobil Nəqliyyatı Xidməti tərəfindən müvafiq işlər görülüb.