DÖVLƏT BAŞÇILARININ GENİŞ TƏRKİBDƏ GÖRÜŞÜ
Sentyabrın 7-də Prezident sarayında Azərbaycan Prezidenti İlham Əliyevin və Ukrayna Prezidenti Viktor Yuşşenkonun nümayəndə heyətlərinin iştirakı ilə geniş tərkibdə görüşü keçirilmişdir.
Prezident İLHAM ƏLİYEV görüşü açaraq dedi:
- Hörmətli cənab Prezident,
Hörmətli qonaqlar!
Mən sizin hamınızı Azərbaycanda səmimi qəlbdən salamlayıram, xoş gəlmisiniz. Bizim çox ətraflı söhbətimiz oldu, qarşılıqlı maraq doğuran, demək olar, bütün məsələləri müzakirə etdik. Düşünürəm ki, indi geniş tərkibdə biz əməkdaşlığımızın əsas istiqamətlərini daha da dəqiqləşdirəcəyik.
Ölkələrimiz arasında ənənəvi xarakter daşıyan çox səmimi, mehriban münasibətlər mövcuddur. Ukrayna və Azərbaycan xalqları bütün dövrlərdə fəal əməkdaşlıq etmişlər, müstəqillik əldə olunduqdan sonrakı dövrdə isə, bu əməkdaşlıq, əlbəttə, yeni forma və xüsusiyyətlər almışdır.
Əməkdaşlığımız çox uğurlu, qarşılıqlı surətdə faydalıdır və bir çox sahələri əhatə edir. Siyasi, iqtisadi baxımdan, humanitar sahədə bizim aramızda münasibətlər çox yüksək səviyyəyə çatmışdır və uğurla inkişaf edir. Əminəm ki, Ukrayna Prezidentinin Azərbaycana rəsmi səfəri də bu münasibətlərin inkişafı üçün yaxşı amil olacaqdır.
Hörmətli Viktor Andreyeviç, Siz Azərbaycana çox böyük nümayəndə heyəti ilə gəlmisiniz. Elə bu faktın özü Sizin ikitərəfli münasibətlərə necə diqqət yetirdiyinizi göstərir. Biz də Azərbaycanda ikitərəfli əlaqələrimizin inkişafına çox böyük əhəmiyyət veririk. Əminəm ki, Sizin səfəriniz, aparılan danışıqlar, imzalanmış sənədlər, şübhəsiz, ölkələrimiz arasında dostluq, tərəfdaşlıq münasibətlərinin inkişafında mühüm mərhələ olacaqdır. Ümidvaram ki, səfər uğurlu keçəcək və ölkəmizdə olmağınız Sizdə yaxşı təəssürat doğuracaqdır. Bir daha xoş gəlmisiniz deyirəm.
Ukrayna Prezidenti VİKTOR YUŞŞENKO təşəkkür edərək dedi:
- Hörmətli İlham Heydər oğlu,
Hörmətli azərbaycanlı dostlar,
Ukrayna tərəfdən olan hörmətli nümayəndələr!
Dəvətdən istifadə etməyimə və bu gün belə mötəbər Ukrayna nümayəndə heyəti ilə Azərbaycanda olmağıma çox şadam. Sizinlə söhbətimizin əsaslandığı tezislərin bir hissəsini burada təkrar etmək istərdim. Sizinlə, ölkənizlə səmərəli siyasi, diplomatik münasibətlər saxlamaq bizim üçün çox rahat, çox asandır. Əsası qoyulmuş ənənələr, xalqlarımız səviyyəsində qədim əlaqələr, rəsmi hakimiyyət səviyyəsində sağlam ikitərəfli münasibətlər buna kömək edir. Ukrayna tərəfi onu əsas tutur ki, Azərbaycanla münasibətlərimizin inkişafının dinamikasının belə səviyyəsi, belə xarakteri strateji münasibətlərin olduğunu göstərir.
Ona görə də biz buradayıq, belə geniş nümayəndə heyəti ilə gəlmişik. Əminəm ki, bu, nəinki bizim mənafelərimizə, Ukraynanın mənafelərinə, həm də ikitərəfli mənafelərimizə cavab verir.
Sonra görüşdə fikir mübadiləsi davam etdirildi.
Bölmənin digər xəbərləri
