DÖVLƏT BAŞÇILARININ GENİŞ TƏRKİBDƏ GÖRÜŞÜ
AZƏRTAC xəbər verir ki, mayın 2-də Prezident sarayında Azərbaycan Prezidenti İlham Əliyevin və Belarus Prezidenti Aleksandr Lukaşenkonun nümayəndə heyətlərinin iştirakı ilə geniş tərkibdə görüşü olmuşdur.
Prezident İLHAM ƏLİYEV görüşü açaraq dedi:
-Hörmətli Aleksandr Qriqoryeviç!
Hörmətli qonaqlar!
Sizi Azərbaycanda ürəkdən salamlamaq istəyirəm. Ölkəmizə xoş gəlmisiniz! Sizin səfərinizi səbirsizliklə gözləyirdik və bu səfəri ikitərəfli dostluq münasibətlərimizin inkişafının çox mühüm amili kimi qiymətləndiririk. Münasibətlərimiz xüsusən son vaxtlar çox dinamik inkişaf edir. Biz çox qısa bir müddətdə iqtisadi əməkdaşlığa, qarşılıqlı əlaqələrimizə dair çox mühüm layihələri müəyyən edə və artıq həyata keçirə bilmişik və indi çox sıx inteqrasiya yolu ilə inamla irəliləyirik.
Mən ölkənizə səfərimi və orada olduğum günləri böyük səmimiyyətlə xatırlayıram. İmzalanmış sənədlər, aparılmış danışıqlar münasibətlərimizə güclü təkan vermişdir. Ölkəmizə bugünkü səfəriniz, eləcə də Sizin ölkənizə mənim səfərim ikitərəfli münasibətlərimizin tarixində ilk səfərlərdir. Sevindirici haldır ki, Siz Azərbaycana böyük nümayəndə heyəti ilə gəlmisiniz. Nümayəndə heyətinin üzvlərinin mövcud məsələləri bizim nümayəndə heyətimizin üzvləri ilə öz səviyyələrində müzakirə etmək, qarşılıqlı əlaqələrin gələcək yollarını müəyyənləşdirmək imkanı olacaqdır.
Əməkdaşlığımızın gündəliyi çox genişdir. Gündəliyə siyasi qarşılıqlı əlaqələr, beynəlxalq təşkilatlarda birgə iştirak, çoxşaxəli və qarşılıqlı surətdə faydalı iqtisadi əməkdaşlıq məsələləri daxildir. Bu gün biz Sizinlə ikitərəfli münasibətlərlə bağlı məsələləri müzakirə edərkən yekdil fikirdə olduq ki, ölkələrimiz və iqtisadiyyatlarımız bir-birini tamamlayırlar. Bu, ciddi tərəfdaşlıq münasibətlərinin inkişafı üçün çox yaxşı bazadır. Biz buna hazırıq, bunu istəyirik və bütün istiqamətlərdə gələcək əməkdaşlığa ümid bəsləyirik. Ümidvaram ki, mənim Belarusa səfərim kimi, Sizin də Azərbaycana səfəriniz uğurlu olacaq və ikitərəfli münasibətlərimizin inkişafında mühüm mərhələyə çevriləcəkdir.
Bir daha “Xoş gəlmisiniz!” deyirəm.
Sonra Prezident ALEKSANDR LUKAŞENKO çıxış edərək dedi:
-Hörmətli İlham Heydər oğlu!
Əziz dostlar!
Mən, ilk növbədə, mehribancasına qəbula görə, nümayəndə heyətimizə göstərilmiş diqqətə görə Sizə ürəkdən təşəkkür etmək istəyirəm. İlham Heydər oğlunun ölkəmizə rəsmi səfərindən ötən müddət ərzində biz çox işlər görmüşük. Bir çox mütəxəssislərimiz burada və sizin nümayəndə heyətləriniz də Belarusda olmuşlar. Onlar bədxahlarımızın piar kimi qiymətləndirdiyi bir çox layihələri gerçəkləşdirməyə başlamışlar. Lakin indi bu, piar deyil, çox qısa zaman kəsiyində təşkil edilmiş real istehsaldır.
Biz nəinki iki ölkənin prezidentləri arasında ən səmimi münasibətlər yaratmamışıq, artıq bilirəm ki, nazirlər də, iri şirkətlərin, müəssisələrin rəhbərləri də dostlaşmışlar. Yəni, bütün səviyyələrdə yaxşı şəxsi münasibətlər yaranmışdır ki, bu da nəinki bir-birini başa düşməyə, həm də yaxşı irəliləyişə kömək edir. Bir az əvvəl İlham Heydər oğlu ilə vurğuladıq ki, nə mənim, nə onun, nə də ölkələrimizin heç bir ölkə ilə belə səmərəli, belə intensiv münasibətləri olubdur.
Bir daha təsdiqləmək istəyirəm ki, əməkdaşlığımızın belə sürətini və ayrı-ayrı istiqamətlərini öz bildikləri kimi, bəzən də narazılıqla qarşılayan bədxahlarımız var. Belələri var və biz onları tanıyırıq. Lakin biz - Belarusda da, Azərbaycanda da bu dövrü çox dəyanətlə keçdik. Biz kiminsə ziddinə, zərərinə olaraq əməkdaşlıq etmirik, biz xalqlarımızın rifahı naminə əməkdaşlıq edirik, çünki təmas nöqtələrini və öz marağımızı tapmışıq. Marağımız heç də təkcə onda deyil ki, Azərbaycan özünün tərəqqisinə doğru gedən çox dinamik inkişaf edən ölkədir. Bu, sadəcə, gurultulu sözlər deyil, bunu hamı deyir. Sizin ölkəniz ümumi daxili məhsulun artımına görə keçən il dünyada birinci yeri tutmuşdur. Dünyada heç bir ölkədə belə artım yoxdur. Firavan ölkəyə çevrilmək üçün sizin hər şeyiniz var, biz bunu bilirik. Lakin məsələ təkcə bunda deyildir.
İndi xalqlarımız arasında yaxşı münasibətlər yaranmışdır. Belarusda yaşayan heç bir azərbaycanlı deməz ki, onun vəziyyəti pisdir. Heç biri. Bu yaxınlarda biz kütləvi informasiya vasitələrində Azərbaycan həftəsi keçirdik. Televiziyada, radioda çoxlu verilişlər oldu, burada yaşayan azərbaycanlılar da, Belarusdakı azərbaycanlılar da danışdılar və heç biri demədi ki, ölkəmizdə onların vəziyyəti pisdir. Sizə burada da deməzlər ki, orada vəziyyətləri pisdir. Xüsusi ab-hava yaranmışdır, lakin əlbəttə, şəxsi əlaqələrin də əhəmiyyəti var. İlham Heydər oğlunun səfərindən sonra bütün səviyyələrdə yaxşı münasibətlərimiz yaranmışdır. Bu, əlaqələrimizin inkişafına kömək edir.
Bir daha vurğulayıram ki, biz kiminsə əleyhinə dostluq etmək niyyətində deyilik. Biz ancaq başqalarının da məmnun qalması və sevinməsi üçün dostluq edirik. Əgər bu, mümkündürsə, biz başqalarının da layihələrimizə qoşulmasına hazırıq. Ona görə də bu səfər, həqiqətən, irəliyə doğru getməkdir. Bu gün imzalayacağımız əsas sənəd - dostluq haqqında müqavilə irəliyə doğru mühüm addım olacaqdır. Mən etimada və öhdəliklərin yerinə yetirilməsinə görə hamıya, ilk növbədə, Azərbaycan Prezidentinə çox minnətdaram.
Bölmənin digər xəbərləri
