DÖVLƏT BAŞÇILARININ GENİŞ TƏRKİBDƏ GÖRÜŞÜ
Avqustun 21-də Prezident sarayında Azərbaycan Prezidenti İlham Əliyevin və İran Prezidenti Mahmud Əhmədinejadın nümayəndə heyətlərinin iştirakı ilə geniş tərkibdə görüşü olmuşdur.
Prezident İLHAM ƏLİYEV görüşü açaraq dedi:
- Hörmətli cənab Prezident!
Hörmətli qonaqlar!
Mən sizi Azərbaycanda ürəkdən salamlayıram, xoş gəlmisiniz!
Biz sizin Azərbaycana səfərinizə çox böyük əhəmiyyət veririk. Əminik ki, bu səfərdən sonra ikitərəfli münasibətlər daha da yüksək pilləyə qalxacaqdır və iki dost, qardaş xalqlar bir-birinə daha da yaxın olacaqlar.
Bizim münasibətlərimiz çox sahələri əhatə edir. Bu əlaqələr bütün sahələrdə - siyasi, iqtisadi, mədəni sahələrdə güclənir, genişlənir, yeni imkanlar açılır və beləliklə, İran ilə Azərbaycan bir-birinə daha yaxın olurlar.
Biz indi təkbətək görüşdə çox geniş fikir mübadiləsi apardıq, çox səmərəli işlədik və bir daha gördük ki, bizim aramızda dostluq, mehribanlıq münasibətləri çox güclüdür, bütün məsələlərə biz vahid mövqedən yanaşırıq. Ümid edirəm ki, bugünkü görüşlər, imzalanacaq sənədlər və aparılacaq danışıqlar əlbəttə, mövcud məsələlərin həlli üçün çox gözəl imkan yaradacaqdır.
Siz İran İslam Respublikasının Prezidenti kimi bu günə qədər Azərbaycanda iki dəfə işgüzar səfərdə olmusunuz. Amma bu, birinci rəsmi səfərdir. Bunun xüsusi əhəmiyyəti var. Mən bir daha sizi Azərbaycanda ürəkdən salamlayıram. Xoş gəlmisiniz!
Sonra İran Prezidenti MAHMUD ƏHMƏDİNEJAD çıxış edərək dedi:
- Bismillahir-rəhmanir-rəhim!
Mən də çox sevinirəm, xoşhalam və İlahiyə şükür edirəm ki, Sizi, dost və qardaş Azərbaycan xalqını ziyarət etmək fürsətinə nail olmuşam. Sizin də qeyd etdiyiniz kimi, biz eyni mədəniyyətə, dinə və müştərək tarixə əsaslanan iki qardaş ölkələrik. Allahın lütfi ilə bizim çox dərin qardaşlıq əlaqələrimiz vardır. Azərbaycan Respublikasının müstəqilliyinin əvvəlindən indiyədək bu əlaqələr get-gedə dərinləşməkdədir. Bu əlaqələrin inkişafı Azərbaycan Respublikasının və İran İslam Respublikasının inkişafıdır. İranın inkişafı Azərbaycanın inkişafı sayıla bilər. Onun üçün biz həm Azərbaycanın müstəqilliyindən, inkişafından və həm də təhlükəsizliyindən çox məmnunuq.
Biz həm regionda, həm də beynəlxalq səviyyədə qarşılıqlı əlaqələrimizin inkişafı istiqamətində müştərək mənafelərimizə uyğun əməkdaşlıq edirik. Çox şükürlər olsun ki, bütün sahələrdə əlaqələrimizin inkişafı yaxşı səviyyədədir. Amma bizim potensial imkanlarımız da çoxdur. Bu potensial imkanlardan səmərəli istifadə edilməsi hər iki ölkənin mənafeyinə uyğundur. Mən bir daha təkidlə qeyd etmək istəyirəm ki, dost və qardaş Azərbaycan Respublikası ilə bizim əlaqələrimizə heç bir məhdudiyyət yaratmaq haqqında düşünmürük.
Daha sonra görüşdə qarşılıqlı maraq doğuran bir sıra məsələlər barədə fikir mübadiləsi aparıldı.
Bölmənin digər xəbərləri
