Bakı, 21 fevral, AZƏRTAC

Azərbaycan Respublikasının Dövlət Dil Komissiyası yanında Monitorinq Mərkəzi Beynəlxalq Ana Dili Günü münasibətilə tədbir keçirib.

Bu barədə AZƏRTAC-a mərkəzdən məlumat verilib.

Tədbiri giriş sözü ilə açan Monitorinq Mərkəzinin direktoru professor Sevinc Əliyeva bu əlamətdar günün tarixindən və əhəmiyyətindən danışıb. Bildirib ki, dil millətin simasını səciyyələndirən mühüm amillərdən biri, onun milli sərvətidir. Millətin dilinin dövlət dili statusuna yüksəlməsi isə tarixi hadisə, milli dövlətçilik tarixinin qızıl səhifəsidir. Bu yüksəliş millətin öz taleyinə sahibliyinin, dövlət qurmaq və qorumaq qüdrətinin, eyni zamanda, dilin zənginliyinin sübutudur.

Ölkəmizdə dil siyasətinin formalaşdırılması, Azərbaycan dilinin dövlət dili kimi tətbiqi işinin təkmilləşdirilməsi və beynəlxalq aləmdə nüfuzunun yüksəldilməsindən danışan professor Sevinc Əliyeva ümummilli lider Heydər Əliyevin və onun siyasi kursunun layiqli davamçısı Prezident İlham Əliyevin bu sahədə müstəsna xidmətlərini vurğulayıb.

“Xüsusən Müzəffər Ali Baş Komandanın 44 günlük Vətən müharibəsi dövründəki çıxışları, səlis və inandırıcı nitqi insanları qələbəyə köklədi, qalibiyyətə səslədi”, - deyə professor qeyd edib.

Alim bildirib ki, ölkə başçısının müvafiq Fərmanı ilə yaradılmış Dövlət Dil Komissiyası yanında Monitorinq Mərkəzi müxtəlif sahələrdə Azərbaycan dilinin düzgün tətbiqinə nəzarət edir və dilimizin beynəlxalq aləmdə nüfuzunun artırılması istiqamətində fəaliyyət göstərir.

“Beynəlxalq Ana Dili Günü və Azərbaycan multikulturalizmi” mövzusunda məruzə edən mərkəzin direktor müavini dosent Gülarə Əmirova diqqətə çatdırıb ki, ana dili xalqın varlığının, mənsub olduğu dövlətin müstəqilliyinin, siyasi mövcudluğunun göstəricisi kimi bir çox ölkələrdə problem olaraq qalır. Bu baxımdan etnomədəni rəngarəngliyi ilə seçilən Azərbaycan tarixən müxtəlif xalqların və mədəniyyətlərin vətəni olub. Azərbaycan ərazisində milli azlıq, azsaylı xalq və etnik qrupların azad yaşaması və sərbəst inkişafı üçün əlverişli şərait yaradılıb. Prezidentin müvafiq Fərmanına uyğun olaraq, ümumtəhsil məktəblərində onların dillərinin tədrisi ilə bağlı bir sıra əməli tədbirlər həyata keçirilib. Respublikada yaşayan milli azlıqların dillərində məktəblər açılır, qəzet, dərslik və metodiki vəsaitlər nəşr edilir.

Respublikamızın ümumtəhsil məktəblərində Azərbaycan dili ilə yanaşı, rus və gürcü dillərində də təlim aparıldığını deyən Gülarə Əmirova azsaylı xalqların və etnik qrupların nümayəndələrinin, demək olar ki, hamısının Azərbaycanın dövlət dilini bildiyini, bu dildən etniklərarası ünsiyyət vasitəsi kimi də istifadə olunduğunu qeyd edib.

Amerika Azərbaycanlılarının Koordinasiya Şurasının İdarə Heyətinin üzvü, Amerika-Azərbaycan İnteqrasiya Mərkəzinin rəhbəri Samir Novruzov vətənə sevginin doğma dilə olan sevgidən başladığını söyləyərək Amerikada Azərbaycan dili və ədəbiyyatının tədrisi istiqamətində nəzərdə tutulan işlərdən danışıb. Azərbaycan dilinin tədrisinin coğrafiyasını beynəlxalq aləmdə genişləndirmək üçün xaricdə fəaliyyət göstərən universitetlər, Azərbaycan dərnəkləri ilə sıx əməkdaşlığın zəruriliyini qeyd edib.

Analitik təhlil və proqramlaşdırma şöbəsinin müdiri dosent Şahlar Məmmədov bu əlamətdar günün əhəmiyyətindən danışıb. Bildirib ki, dünyada məhv olmaq təhlükəsi ilə üzləşən dillərin qorunması məqsədilə keçirilən Beynəlxalq Ana Dili Günü hər kəsə öz doğma dilinin varlığını hiss etmək, onunla qürur duymaq, onu qorumaq, inkişaf etdirmək hüququ olduğunu bir daha xatırladır. Ana dilimizin hərtərəfli inkişafı, dövlət dilinə çevrilməsi, diplomatiya aləminə yol açması, dünyanın ən mötəbər tədbirlərində eşidilməsi isə hamımız üçün qürurverici haldır. Natiq onu da əlavə edib ki, Azərbaycan dili zənginliyi, gözəlliyi ilə seçilməklə yanaşı, həm də humanist dildir. Azərbaycan dili digər dilləri sıradan çıxarmır, hətta onların inkişafına və zənginləşməsinə təkan verir.

Reklam və kütləvi informasiya vasitələrinin monitorinqi şöbəsinin müdiri Vəfa İsmayılova ölkə xaricində yaşayan soydaşlarımızın üzərinə Azərbaycanın dəyərlərini tanıtmaq kimi mühüm bir missiyanın düşdüyünü vurğulayıb. O qeyd edib ki, ana dili hər bir millətin maddi və mənəvi irsini qoruyan və inkişaf etdirən güclü vasitədir. Beynəlxalq Ana Dili Günü hər kəsi bu amal ətrafında birləşməyə səsləyir. Dil siyasətinin birmənalı şəkildə formalaşdırılması, milli-mənəvi sərvətimiz olan dilimizin qorunması və təbliğ edilməsi hər birimizin vətəndaşlıq borcudur.