Bakı, 19 mart, AZƏRTAC

Vətən sərhəddən başlayır... Vətən torpağının hüdudları keşiyində ayıq-sayıq dayanan gələcəyin sərhədçiləri Dövlət Sərhəd Xidmətinin (DSX) Xüsusi Məktəbində peşəkar, savadlı vətəndaşlar kimi yetişirlər. Vaxtilə burada təhsil almış kursantlar Vətən müharibəsi zamanı Ali Baş Komandan İlham Əliyevin rəhbərliyi ilə qazanılan parlaq Zəfərdə öz igidliklərini dəfələrlə sübut edib, Üçrəngli Bayrağımızın sərhədlərimiz boyunca daim dalğalanmasının təminat simvoluna çevriliblər. Onlar dövlətimizin başçısı tərəfindən qoyulmuş bütün tapşırıqları uğurla icra etməyə davam edən qəhrəmanlardır.

Uşaqların və gənclərin vətənpərvər ruhda böyüdüldüyü, 5-ci sinifdən başlayaraq hərb sirlərinin öyrənildiyi DSX-nin Xüsusi Məktəbi 2011-ci il oktyabrın 18-də istifadəyə verilib. Məktəb Heydər Əliyev Fondunun dəstəyi ilə yaradılıb. Xəzər rayonunun Mərdəkan qəsəbəsində yerləşən məktəbdə kursantlar xüsusi rejimdə həftənin 5 günü təhsil alırlar.

AZƏRTAC-ın əməkdaşları gələcəyin cəsur sərhədçilərini kiçik yaşlardan formalaşdıran DSX-nın Xüsusi Məktəbindən reportaj hazırlayıb.

Bu tədris ocağı ilə bağlı məlumat əldə etmək üçün əvvəlcə DSX-nın Xüsusi Məktəbinin rəisi, polkovnik Asif Muradovla həmsöhbət olduq. Ətraflı məlumat verən polkovnik bildirdi ki, DSX-nın Xüsusi Məktəbi Azərbaycanın Birinci vitse-prezidenti Mehriban Əliyevanın təşəbbüsü ilə yenidən qurulub: “2011-ci il oktyabrın 18-də Mehriban xanım Əliyeva Xüsusi Məktəbin açılışında iştirak edib. Prezident İlham Əliyevin 2014-cü il 22 may tarixli Fərmanına əsasən, DSX-nın Xüsusi Məktəbinə Xüsusi təyinatlı təhsil müəssisəsi statusu verilib. Məktəbdə akt zalı, Ümummilli Lider Heydər Əliyevin şərəfinə yaradılmış muzey, interaktiv atəş zalı, xarici dil, informatika, fizika və ibtidai hərbi hazırlıq kabinetləri fəaliyyət göstərir. Bütün kabinetlər yeni və müasir avadanlıqlarla təchiz olunub. Burada trenajor otaqları, kitabxana, yeməkxana, istirahət və yataq otaqları var. Məktəbin həyətində isə peyntbol, atçılıq və futbol meydançaları inşa olunub. Kursantlara peyntbol meydançasında döyüş qaydaları, hücum, müdafiə kimi hərbi üsullar öyrədilir. Hazırda isə məktəbdə 700-ə yaxın kursant təhsil alır”.

Asif Muradov Xüsusi Məktəbin yaranmasında əsas məqsədin DSX Akademiyasında təhsil almağa hazır olan, vətənpərvər, dövlətinə, xalqına sadiq sərhədçi kadrların yetişməsi olduğunu deyib. Sözsüz ki, məktəb rəisinin ifadələri tamamilə həqiqəti əks etdirirdi. Buradakı bütün kursantlar yaşlarının çox olmamalarına baxmayaraq yüksək səviyyədə təhsil alır, fiziki cəhətdən sağlam, mənəvi cəhətdən sarsılmaz, gələcəkdə Vətənimizin sərhədlərinin qorunmasında öz vəzifə borclarını şərəflə yerinə yetirməyi bacaracaq sərhədçi olmağın arzusu ilə yaşayırlar. Polkovniklə söhbət zamanı burada təhsil alan kursantların tədris prosesi ilə bağlı da maraqlandıq. A.Muradov Xüsusi Məktəbdə tədris prosesinin ümumtəhsil məktəb proqramına və nizamnaməsinə uyğun təşkil edildiyini dedi. Burada dərs prosesinin əsas məqsədi kursantların şəxsiyyət kimi yetişməsinə, onların intellektual bilik səviyyələrinin, dünyagörüşlərinin artmasına, yeni texnologiyaları çevik mənimsəmələrinə, hərbi-texniki bacarıqlarının formalaşmasına, ən əsası isə onların sərhədçi ruhunda tərbiyə olunmasına yönəlib. Onun sözlərinə görə, ayrı-ayrı fənlər üzrə dərnəklər və viktorinalar, fənn günləri keçirilir. Bilik yarışları, diskussiyalar, inşa, rəsm və digər müsabiqələr təşkil edilir. Kursantların fiziki cəhətdən sağlam böyümələrinə xüsusi olaraq diqqət yetirilir. Hər yaş üzrə fiziki hazırlıq normalarını yerinə yetirmələri kursantların qarşısına tələb kimi qoyulur. Eyni zamanda, kursantlar üçün Azərbaycan filmləri nümayiş etdirilir. Onlar mütəmadi olaraq muzeylərə, mədəniyyət ocaqlarına və digər yerlərə gəzintilərə gedirlər.

Gündə 3 dəfə qidalanan məktəblilər ailə qayğısı ilə əhatə olunur desək yanılmarıq. Çünki onlar hər həftənin çərşənbə gününü fərqli qeyd edirlər. Belə ki, həftəiçi doğum günü olan şagirdlərin ad günü qeyd edilir, tort kəsilir, şəkil çəkdirilir.

Xüsusi Məktəbin 9-cu sinif kursantı Məhəmməd Abbas təhsil ocağı ilə bağlı təəssüratlarını bizimlə bölüşdü. O, burada öyrəndiyi hərb sirlərinin gələcəkdəki zabit həyatında böyük rol oynayacağına əmin olduğunu dedi: “Hazırda DSX-nin Xüsusi Məktəbinin beşinci kursunda təhsil alıram. Bu məktəbdə olarkən vaxtımızı səmərəli istifadə edirik - şahmat oynayırıq, üzgüçülüklə məşğul oluruq və sair idmanla məşğul oluruq. Hərbinin ilkin mərhələlərini bu məktəbdə öyrənmək gələcək yolumuzda - zabitlik həyatımızda böyük rol oynayır.

Məktəbdə kursantların yaxşı təhsil almaları, fiziki və mənəvi tərbiyəsi, Vətənə və cəmiyyətə yararlı insan kimi yetişmələri üçün Heydər Əliyev Fondu tərəfindən müxtəlif nəşrlərlə təmin olunmuş kitabxana da fəaliyyət göstərir.

Kursant Büsat Səlimli: “DSX-nin Xüsusi Məktəbində beşinci sinifdə təhsil alıram. Burada müəllimlər çox yaxşı dərs keçir. Bizə əlavə fənlər də tədris olunur. Onlar bizi burada əlavə ekskursiyalara aparıb gətirirlər. Bu məktəbdən çox razıyam. Gələcəkdə DSX-nin xüsusi məktəbini bitirib, onun Akademiyasına daxil olaraq sərhədçi peşəsinə yiyələnmək istəyirəm. Xüsusi Məktəbin kursantı olmağımdan şərəf və qürur duyuram. Bizə yaradan bu imkanlardan istifadə edərək yaxşı oxuyacağımıza, Vətənimizə, xalqımıza, layiqli övlad olacağımıza söz veririk”.

Kursant Mirəli Kazımov isə bildirib: “Altıncı sinifdə təhsil alıram. Ən sevdiyim dərslər fiziki tərbiyə, riyaziyyat və ingilis və fars dilidir. Taqım komandirlərimiz və başqa zabitlərimiz öz təcrübələrini bizimlə bölüşürlər”.

Kursant Ağacamal Aslanov deyib: “Vətənimizin müqəddəs sərhədlərinin keşiyində dayanmaq şərəfinin gələcək daşıyıcılarıyıq. DSX-nin Xüsusi Məktəbinin kursantları adından bizə göstərilən ali diqqət və qayğıya görə Prezident, Ali Baş Komandan İlham Əliyevə, Birinci vitse-prezidenti Mehriban Əliyevaya dərin minnətdarlığımızı bildiririk. Hazırda 11-ci sinifdə təhsil alıram. Bizə göstərilən etimadı doğruldacağıq. Məqsədim təhsili uğurla başa vuraraq müstəqil Azərbaycana layiqli vətəndaş, Ali Baş Komandana sadiq zabit olmaqdır. Mən məktəbdaxili keçirilən olimpiada və yarışlarda iştirak etmişəm. Coğrafiya fənnindən keçirilən gənc tədqiqatçılarla bağlı konfransda qlobal problemlər haqqında çıxış etmişəm. Buna görə də məktəbin rəisi polkovnik Asif Muradov tərəfindən təşəkkürnamə ilə təltif olunmuşam”.

Xüsusi məktəbin riyaziyyat müəllimi kapitan Cabir İsgəndərov deyib: “Xüsusi məktəbdə riyaziyyat fənnini tədris edirəm. 2011-ci ildən xüsusi məktəbdə riyaziyyat müəllimi kimi fəaliyyət göstərirəm. Prezident, Müzəffər Ali Baş Komandan İlham Əliyev ölkəmizin hərbi qüdrətinin artırılmasına böyük diqqət göstərir. Bunun bariz nümunələrindən biri də 2011-ci il oktyabrın 13-də DSX-nin Xüsusi Məktəbinin yaradılmasıdır. Xüsusi məktəbdə təhsil almaq üçün çoxsaylı müraciətlər olduğundan, qəbul planı yerləri ildən-ilə artırılır. Burada təhsil alan kursantlar gələcəkdə Vətən sərhədlərinin keşiyində dayanan zabit kimi intizamlı və daha da məsuliyyətli olacaqlar. Zaman gələcək, kursantlarımızın əksər hissəsi çiyinlərində general rütbəsi daşıyacaq”.

Azərbaycanın Əməkdar müəllimi Şöhrət Quliyeva söyləyib: “Fəaliyyət göstərdiyi müddətdə DSX-nin Xüsusi Məktəbi ölkəmizdə böyük nüfuz qazanıb.

Vətən sərhəddən başlayır. Sərhədimizi qorumaq isə dövlətimizin təhlükəsizliyinin təmin olunması deməkdir. İnsanda vətənpərvərlik hissi varsa, yüksək mənəviyyata malikdirsə, Azərbaycan dövlətinin milli-mənəvi dəyərlərini daxillərində qoruyub saxlayacaqsa, demək onda Vətəni qorumaq hissi də yaranacaq. Gələcəyin zabitlərini bu istiqamətdə hazırlamağa çalışırıq”.

Yeni və müasir avadanlıqlarla təchiz olunan Xüsusi Məktəbin bu otağında isə pilotsuz uçuş aparatlarının (PUA) ilkin istifadəsi öyrədilir.

DSX-nin Xüsusi Məktəbinin tərbiyəçi-müəllimi İlqar İsmayılov: “İkinci Qarabağ müharibəsində pilotsuz uçuş aparatlarının əvəzsiz rolu olub. Odur ki, Xüsusi Məktəbdə də müvafiq istiqamətdə pilotsuz uçuş aparatlarının simulyator variantını kursantlarımıza ilkin anlayış olaraq tədris edirik. Gələcəkdə DSX-nın Akademiyasında da bu fəaliyyətlərin davamı olacaq”.

Xatırladaq ki, gələcəyin sərhədçilərinin hazırlandığı məktəbə 2024-2025-ci tədris üçün qəbul prosesi start verilib. IV sinfində təhsil alan, fiziki cəhətdən sağlam olan hər bir Azərbaycan vətəndaşı aprelin 1-dək Dövlət İmtahan Mərkəzinin (DİM) rəsmi internet saytında qeydiyyatdan keçə və aprelin 14-də baş tutacaq imtahanlarda iştirak edə bilərlər.