İQTİSADİYYAT
Dünya Bankının həyata keçirdiyi Azərbaycan Kənd İnvestisiya Layihəsinin 3-cü mərhələsi üzrə danışıqlar aparılıb
Bakı, 26 sentyabr, AZƏRTAC
Sentyabrın 26-da kənd təsərrüfatı naziri Heydər Əsədov Dünya Bankının nümayəndə heyəti ilə görüşüb.
Kənd Təsərrüfatı Nazirliyindən AZƏRTAC-a bildiriblər ki, görüşdə əsas məqsəd Dünya Bankı tərəfindən həyata keçirilən Azərbaycan Kənd İnvestisiya Layihəsinin (AzKİL) 3-cü mərhələsi üzrə danışıqların aparılması olub.
Nazir Azərbaycanda aqrar islahatların həyata keçirilməsində, kənd təsərrüfatının inkişafında Dünya Bankı tərəfindən həyata keçirilən layihələrin müstəsna rolunu və səmərəliliyini qeyd edərək, bundan sonra da yeni layihələrin həyata keçirilməsi üçün əməkdaşlığa önəm verdiyini bildirib. O, Dünya Bankı ilə əməkdaşlıqdan məmnun olduğunu diqqətə çatdıraraq birinci və ikinci Kənd İnvestisiya layihələrinin müsbət nəticələr verdiyini, infrastruktur layihələrinin həyata keçirildiyini, icmaların yaranmasında, bazara çıxış imkanlarının yaxşılaşdırılmasında fermer və sahibkarların bacarıqlarının, məşğulluğunun və gəlirlərinin artırılmasında bu layihənin əhəmiyyətini vurğulayaraq, fermer və sahibkarların bundan bəhrələndiyini qeyd edib.
Dünya Bankının layihə üzrə qrup rəhbəri Satoşi İşihara Kənd İnvestisiya Layihəsi çərçivəsində həyata keçirilən layihələrin əhəmiyyətini qeyd edərək, əməkdaşlığa önəm verdiyini bildirib.
Dünya Bankının layihə üzrə qrup rəhbərinin müavini Tara Şərəfudhin Kənd İnvestisiya layihələrinin birinci və ikinci mərhələləri üzrə görülmüş işlər üzrə məlumat verərək, 2005-ci ildən bu günə qədər AzKİL çərçivəsində 1999 icmayönümlü layihə həyata keçirildiyini bildirib. Tara Şərəfudhin bu layihələrin əsasən infrastruktur layihələri olmaqla 1141 kənddaxili yolun bərpası, 262 içməli su sisteminin bərpası, 147 irriqasiya və drenaj sisteminin bərpası, 42 məktəbin təmiri və bərpası, 21 uşaq bağçasının təmirı və bərpası, 200 icmada abadlıq işlərinin aparılması və s. tədbirlərin həyata keçirildiyini və coğrafi xəritənin tərtib olunduğunu qeyd edib. Layihə çərçivəsində həyata keçirilmiş tədbirlər son nəticədə icmaların formalaşmasına, bacarıq və vərdişlərin, o cümlədən əhalinin gəlirlərinin artırılmasına yönəlib.
Dünya Bankının layihə üzrə qrup rəhbərinin müavini Tara Şərəfudhin AzKİL-3 layihəsi üzrə hazırlanmış konsepsiya barədə məlumat verib. Bildirib ki, layihədə əsas məqsəd infrastrukturun hazırkı vəziyyəti, icmalarda potensialların və maliyyə çıxışlarının, kiçik sahibkarların dəstəklənməsi, gəlirlərin artırılmasında dayanıqlılığın, kənd əhalisinin bacarıqlarının və vərdişlərinin artırılması, beynəlxalq təcrübədən yararlanmaqla coğrafi informasiya sistemi üzrə məlumatların toplanması, (xəritələrin hazırlanması,) AZKİL-1 və Azkil-2-nin nəticələrindən bəhrələnməklə icmal infrastrukturunun dayanıqlılığının artırılması, infrastruktur obyektlərinin, o cümlədən AzKİL tərəfindən tikilmiş obyektlərin idarə edilməsində bacarıqların gücləndirilməsi, bələdiyyələrin kənd yolları, kəndin su təchizatı sistemləri və digər infrastruktur obyektlərinin hüquqi sahibləri kimi öz öhdəliklərini tam yerinə yetirməsini təmin etmək məqsədilə onların maliyyə, texniki bacarıq və potensialında mövcud olan boşluqların aradan qaldırılmasıdır.
Nazir Heydər Əsədov layihənin səmərəliliyini artırmaq məqsədilə infrastruktur layihələri ilə yanaşı, aqraryönümlü sahələrə də üstünlük verilməsinin vacibliyini bildirib. O, beynəlxalq təcrübədən yararlanmaqla süd və ət kəsimi məntəqələrinin, kooperativlərin yaradılmasının, bağların, terraslarda fındıq bağlarının salınmasının, tinglik təsərrüfatlarının yaradılmasının, bütövlükdə kompleks yanaşmanın önəmini vurğulayıb və layihəni bütövlükdə dəstəklədiyini bildirib.
Yekunda təkliflər nəzərə alınmaqla layihələrin təkmilləşdirilməsinin, strateji qiymətləndirmə aparmaqla aqrar sektorda ehtiyacların müəyyənləşdirilməsinin vacibliyi qeyd olunub.