DÜNYA İRANIN İMDADINA YETİR
AZƏRTAC-ın Tehandan aldığı xəbərə görə, hazırda zəlzələ bölgəsində işləyən Rusiya həkimləri artıq 40 adama tibbi yardım göstərmiş və onların həyatını xilas etmişlər. Hər cür lazımi avadanlıq və dava-dərmanla təchiz edilən 157 nəfər rusiyalı xilasedici və həkim zəlzələdən zərər çəkənlərə mümkün bütün yardımı göstərir.
Ukrayna Prezident Leonid Kuçmanın göstərişinə əsasən Bəm şəhərində axtarış-xilasetmə işləri aparılması və tibbi yardım göstərilməsi üçün mütəxəssislər və həkimlər göndərmişdir. AZƏRTAC-ın Ukrinformdan aldığı xəbərə görə, dekabrın 28-də təbii fəlakət zonasına Ukraynadan mobil hospital da gətirilmişdir.
Yaponiya hökuməti İrana maddi yardımını artııb, bir milyon dollara çatdırmağı qərara almışdır. Bu vəsait zəlzələdən zərər çəkənlərin ərzaq və içməli su ilə təmin edilməsi, Bəm şəhərinə çadırlar, elektrik generatorları və adyal göndərilməsi üçün nəzərdə tutulmuşdur. Yaponiya İrana xilasedicilər və həkimlər də göndərmişdmr. Bundan başqa, oraya axtarış-xilasetmə əməliyyatlarında iştirak üçün hərbi qulluqçular da göndərmək qərara alınmışdır.
ABŞ ilə İran arasında münasibətlərin gərgin olmasına baxmayaraq, Vaşinqton Bəmdə baş vermiş dəhşətli zəlzələdən zərər çəkənlərə yardım göstərilməsindən kənarda qalmır. 1980-ci ildən bəri ilk dəfə olaraq ABŞ təyyarəsi İran ərazisinə enmişdir. O, ölkə hökumətinin ayırdığı humanitar yardımı, xilasediciləri, həkimləri, dava-dərmanı Bəm şəhərinə gətirmişdir.
İran xalqının müsibətinə qonşumuz Gürcüstan da biganə qalmadı. AZƏRTAC-ın müxbirinin Tbilisidən verdiyi xəbərə görə, dekabrın 28-də səhər 22 xilasedici və bir neçə həkim Gürcüstan paytaxtından Bəm şəhərinə yola düşmüşdür.
Bütün bunlar sübut edir ki, dünyada terror, təbii fəlakətlər nə qədər tüğyan etsə də, xalqlar bir-birinin məruz qaldığı fəlakətə biganə deyildir, belə ağır günlərdə umu-küsünü, ədavəti tamam unudaraq, bir-birinin imdadına yetir, imkanı daxilində hər cür yardım göstərirlər.
Bölmənin digər xəbərləri
