DÜNYADA 9 MİLYON VARLI VAR
AZƏRTAC Frans Press agentliyinə istinadla xəbər verir ki, dünyada var-dövləti milyon dolları aşan 9 milyon adam var.
Bu, Merrill Lynch sərmayə bankının və Capgemini şirkətlər qrupunun apardıqları tədqiqatlardan məlum olmuşdur.
Tədqiqatçılar milyonu pullarda, fondlarda, istiqraz vərəqələrində, yaxud səhmlərdə cəmlənmiş adamı milyonçu saymışlar. Əsas yaşayış yerinin, həmçinin fərdi kolleksiyaların dəyəri nəzərə alınmamışdır.
Varlıların sayı 2006-cı ildə 8,3 faiz artmışdır. Onlar bütövlükdə 37,2 trilyon dollara nəzarət edir ki, bu da 2005-ci ildəki göstəricidən 11,4 faiz çoxdur. Milyonçuların sayı Rusiya, Sinqapur, Hindistan və İndoneziyada daha çox artmışdır.
Var-dövləti 30 milyon dolları ötən ultravarlıların da sayı 11,3 faiz artmışdır. Bu qrupa 94 min 970 adam daxildir. Digərlərinə nisbətən onların var-dövləti ötən il daha sürətlə, 16,8 faiz artmışdır.
Gözlənilir ki, 2011-ci ilədək milyonçuların bütövlükdə var-dövləti 51,6 trilyon dollara çatacaqdır.
Bölmənin digər xəbərləri
