DÜNYANI DƏYİŞDİRƏN AVTOMAT
Kahanerin məlumatına görə, hazırda ordularda, polislərdə, terrorçularda, cinayətkarlarda və digər kriminal qruplaşmalarda 100 milyon ədəddən çox AK-47 avtomatı var, yəni Yer kürəsinin yaşlı sakinlərinin hər 60 nəfərinə bir avtomat düşür. 50-dən artıq nizami ordu bu avtomatla silahlanmışdır. İndi Kalaşnikov avtomatı 19 ölkədə istehsal olunur. Bu silahın köməyi ilə dünyada üst-üstə artilleriya və raket atəşləri, aviasiya bombardmanları ilə müqayisədə daha çox adam öldürülmüşdür.
Kahaner bu silahın populyarlığını onun heyrətamiz göstəriciləri ilə izah edir. AK-47 ucuzdur (dünyanın müxtəlif regionlarında qiyməti 10-300 dollar arasındadır), hazırlanması və işlədilməsi sadədir, atəş zamanı çox nadir hallarda açılmır, olduqca etibarlıdır, ondan istifadə üçün xüsusi hazırlıq keçmək lazım deyil, atəşin yüksək sərrastlığını təmin etməsə də, dəqiqədə 700 güllə atmağa qadirdir.
Alim xatırladır ki, ABŞ İraqın yeni hakimiyyət orqanlarına polisi Amerikada istehsal olunan M-16 avtomat tüfəngləri ilə silahlandırmağı təklif etmişdir, lakin onlar Kalaşnikov avtomatlarını üstün tutmuşlar (İordaniyanın göndərdiyi bu avtomatlar vaxtilə Almaniya Demokratik Respublikasında buraxılmışdır). Bu bir yana, İraqdakı bir çox amerikalı əsgərlər öz ştat silahından deyil, AK-47-dən istifadə etməyə üstünlük verirlər.
Xatırladaq ki, bu, ABŞ alimlərinin Kalaşnikov avtomatı fenomeni haqqında yazdıqları ilk kitab deyildir. 2004-cü ildə silah eksperti Co Poyerin “Kalaşnikov avtomatları və onların variasiyaları”, 2001-ci ildə hərb tarixçisi Kris MakNabın “Ak-47”, 2000-ci ildə Çarli Katşounun və rusiyalı Valeri Şilinin “Kalaşnikov avtomatının əfsanələri və reallığı”, 1988-ci ildə Edvard Etsellin “AK-47-nin tarixi. Kalaşnikov silahının təkamülü” kitabları nəşr olunmuşdur.
Bölmənin digər xəbərləri
