Əbu-Dabidə görmə əngəllilər üçün xüsusi çimərlik açılıb
Bakı, 21 aprel, AZƏRTAC
Birləşmiş Ərəb Əmirliklərinin paytaxtında görmə əngəlli insanlar üçün ilk xüsusi çimərlik açılıb.
AZƏRTAC xarici mediaya istinadla xəbər verir ki, bu mühüm təşəbbüs əhalinin bütün kateqoriyaları üçün ictimai yerlərin əlçatanlığının təmin edilməsi üzrə dövlət proqramının bir hissəsi kimi həyata keçirilib.
Yeni çimərlik “Gate 3” ərazisindəki Korniş adlanan məkanda yerləşir və 1000 kvadratmetr ərazini əhatə edir.
Çimərliyə giriş həm görmə əngəllilər, həm də onları müşayiət edən şəxslər üçün ödənişsizdir. İnfrastruktur bütün gəzinti sahəsi boyunca asfaltlanmış xüsusi toxunma cığırlarını əhatə edir və məlumat lövhələri Brayl yazıları ilə təchiz edilib.
Dənizin dayaz yerinə təhlükəsiz giriş bələdçi kəndir və son nöqtələrdə səs mayakları olan hasarlanmış yol ilə təmin olunub. Çimərlikdə peşəkar xilasedicilərin daimi nəzarəti altında hər yaşdan olan ziyarətçilər üçün xüsusi üzgüçülük sahəsi var.
Çimərlik infrastrukturuna yaşlılar və xüsusi qayğıya ehtiyacı olan qonaqlar üçün rahat panduslar və cığırlar, uyğunlaşdırılmış tualetlər, suya rahat giriş üçün xüsusi üzən stullar, pulsuz içməli su məntəqələri və xüsusi parkinq yerləri daxildir.
Çimərlik hər gün səhər 6-dan gecə yarısına qədər açıqdır, üzməyə yalnız gün batana qədər icazə verilir. Lisenziyalı tibb işçisi gün ərzində burada növbətçilik edir, lazım gələrsə təcili yardım göstərməyə hazırdır.
Bölmənin digər xəbərləri
