Şuşa, 27 noyabr, AZƏRTAC

Şuşa Şəhəri Dövlət Qoruğu İdarəsinin təşkilatçılığı, Azərbaycan Respublikasının Birləşmiş Ərəb Əmirliklərindəki səfirliyinin dəstəyi ilə keçirilən “Şuşa günləri” çərçivəsində Şuşa rayonunda Azərbaycan Respublikası Prezidentinin xüsusi nümayəndəsi Aydın Kərimov və rəhbərlik etdiyi nümayəndə heyəti noyabrın 26-27-də Əbu-Dabi şəhərində rəsmi səfərdə olublar.

Şuşa Şəhəri Dövlət Qoruğu İdarəsindən AZƏRTAC-ın bölgə müxbirinə bildirilib ki, səfər çərçivəsində Şuşa rayonunda Azərbaycan Respublikası Prezidentinin xüsusi nümayəndəsi Aydın Kərimov BƏƏ-nin mədəniyyət naziri Şeyx Salem Al Qasimi, BƏƏ xarici işlər nazirinin müavini Xalid Belhoul və BƏƏ-nin Şəhərsalma və Nəqliyyat Departamenti rəhbərinin müavini Saif Sultan Al Nasseri ilə görüşüb. Azərbaycanın BƏƏ-dəki səfiri Elçin Bağırov və nümayəndə heyətinin üzvləri - Şuşa Şəhəri Dövlət Qoruğu İdarəsinin icraçı direktoru Tural Novruzov, Xüsusi nümayəndəliyin baş məsləhətçisi Elşad İskəndərov, Qoruğun məsul əməkdaşları görüşlərdə iştirak ediblər.

Hər bir görüşdə ölkələrimiz arasında ikitərəfli əlaqələrdən söz açılıb, dünyada ən mötəbər tədbirlərdən biri hesab edilən COP29 layihəsinin ölkəmizdə yüksək səviyyədə, uğurla həyata keçirilməsi xüsusi olaraq vurğulanıb və Azərbaycan tərəfi bu münasibətlə təbrik edilib. Eyni zamanda, Şuşanın Baş Planı haqqında məlumat verilib, iki şəhərin münasibətlərinin daha da möhkəmlənməsi, əlaqələrinin inkişafı müzakirə olunub.

Dövlət Turizm Agentliyinin dəstəyi ilə “Şuşa günləri” çərçivəsində “Conrad” otelində “Şuşa - dünən və bu gün” adlı foto-sərgi və Qarabağın milli geyimləri də nümayiş etdirilib. İştirakçılar Azərbaycan kulinariyasının ləziz təamlarından və şirniyyatlarından dadıblar.

Tədbirdə BƏƏ XİN-in Asiya və Sakit Okean Departamentinin direktoru Əbdüləziz Əl-Niyadi və Əbu-Dabi şəhərinin dövlət qurumlarının rəhbərləri də iştirak ediblər.

“Şuşa günləri” çərçivəsində Azərbaycanın mədəniyyət və incəsənət ustalarının iştirakı ilə möhtəşəm qala–konsert keçirilib.