ƏDLİYYƏ NAZİRLİYİNDƏ GÖRÜŞ
Ədliyyə Nazirliyindən AZƏRTAC-a bildirmişlər ki, Azərbaycan-Fransa dostluq əlaqələrinin, o cümlədən hüquqi sahədə, həmçinin ədliyyə orqanları arasında münasibətlərin uğurla inkişaf etdiyini vurğulayan nazir bu ilin yanvarında Azərbaycan Prezidenti İlham Əliyevin Fransaya rəsmi səfəri zamanı ölkələrimizin ədliyyə nazirlikləri arasında əməkdaşlıq haqqında imzalanmış sazişin əhəmiyyətini qeyd etmiş və ölkədə həyata keçirilən islahatlardan söhbət açmışdır.
Səfir R.Blatman ölkələrimiz arasında qarşılıqlı münasibətlərin inkişafında dövlət başçılarının müstəsna xidmətlərini vurğulayaraq, nazirlər səviyyəsində və müxtəlif sahələrdə əlaqələrin daha da möhkəmləndirilməsinə çalışacağını bildirmişdir. Azərbaycanın uğurlarını məmnunluqla qeyd edən səfir hüquqi sahədə əməkdaşlığın genişlənməsi imkanlarına toxunmuş və konkret tədbirlərin keçirilməsi ilə bağlı təşəbbüs göstərmişdir.
Görüşdə Azərbaycanda ədalət mühakiməsinin səmərəliliyinin artırılması, bu məqsədlə hakimlərin seçilməsi və tədrisi prosesinin təkmilləşdirilməsi üzrə tədbirlərə toxunulmuş, bu günlərdə ölkəmizdə səfərdə olan beynəlxalq ekspertlərlə, o cümlədən Fransa nümayəndələri ilə bu sahədə təcrübə və fikir mübadiləsinin aparılması məmnunluqla vurğulanmışdır.
Görüşdə ədliyyə nazirinin müavini Toğrul Musayev iştirak etmişdir.
Bölmənin digər xəbərləri
