“ƏL-QAİDƏ” DAXİLİNDƏ İDEOLOJİ PARÇALANMA GEDİR
AZƏRTAC-ın İTAR-TASS-dan aldığı xəbərə görə, “Əl-Qaidə” daxilində, görünür, dərin ideoloji parçalanma baş vermişdir. Buna qurumda ikinci adam - bu terror şəbəkəsi üzərində nəzarəti ələ keçirməyə çalışan Ayman əz-Zəvahiri səbəb olmuşdur. ABŞ-ın nüfuzlu “Hyusuik” həftəlik qəzeti “Taliban” hərəkatındakı mənbələrdən alınmış məxsusi məlumat əsasında bu qənaətə gəlmişdir.
Qəzet yazır ki, Amerika kəşfiyyatının məlumatına görə, çox güman ki, xəstə olan Üsamə bin Laden gölgədə qaldığı bir vaxtda əz-Zəvahiri fəal surətdə operativ nəzarəti ələ keçirməyə hazırlaşır. “Əl-Qaidə” daxilində əz-Zəvahiri həddən artıq nüfuzlu şəxsə çevrilmişdir və Pakistanın Prezidenti Pərviz Müşərrəfi devirmək fikrinə düşmüşdür.
Əks-terror siyasətinin hazırlanmasında iştirak edən, lakin adının açıqlanmasını istəməyən ABŞ-ın yüksəkvəzifəli nümayəndəsi demişdir ki, “Əl-Qaidə” daxilində Misir və Liviya fraksiyaları, habelə Səudiyyə Ərəbistanı və Orta Asiyadan olan iştirakçılar arasında ixtilaflar, həqiqətən, var. ABŞ HDQ-nin kəşfiyyat məsələləri üzrə eksperti Con Arkill isə baş verənləri “Əl-Qaidə” strategiyası ruhunda döyüş adlandıraraq vurğulamışdır ki, təşkilat daxilində diqqəti Pakistan hökumətinin devrilməsi üzərində cəmləşdirib-cəmləşdirməmək ətrafında mübahisələr gedir, çünki bu, nüvə imkanlarına nəzarət etməyə şərait yaradacaqdır.
Bölmənin digər xəbərləri
