Kiyev, 6 fevral (AZƏRTAC). Xarkov Dövlət Dizayn və İncəsənət Akademiyasında (XDDİA) ali məktəb tələbələri arasında animasiya personajlarının müsabiqəsinin sonuncu turu başa çatmışdır.

Diqqətəlayiq haldır ki, animasiya personajları layihəsinin rəhbəri həmyerlimiz Elçin Orucovdur. O, təqribən 10 il ərzində mindən çox belə qeyri-adi personaj yaratmışdır. Xüsusi qeyd edək ki, rəssamlıq təhsili olmayan Elçin personajların bədii modelləşdirilməsi sahəsində, demək olar, yeni istiqamət yaratmışdır. Mütəxəssislərin fikrincə, layihənin təkcə postsovet məkanı ölkələrində deyil, bütün dünyada analoqu yoxdur. Elçin Orucovun qəhrəmanları digər animasiya personajlarından fərqli olaraq müsbət aurası və xeyirxahlığı ilə fərqlənir, uşaq psixikasına yaxşı təsir göstərir. Elçin demişdir: ”Bu layihə ilə mən narahat və həyəcanlı dünyamıza bir qədər xeyirxahlıq gətirmək istədim”.

Layihə “Mövcud olmayan məxluqlar” adlanır. Onun ikinci animasiya adı “Tartoniki”dir. Müəllifə görə, bütün personajlar “Tartoniya” adlanan əcaib planetin zərərsiz balaca sakinləridir.

Animasiya sahəsində aparıcı mütəxəssislər, o cümlədən XDDİA-nın “Mültimedia dizaynı” kafedrası istedadlı həmvətənimizin layihəsi ilə maraqlanmışlar. Kafedra müdiri, dosent, sənətşünas, Ukrayna Dizaynerlər İttifaqının üzvü Tatyana Kostenko E.Orucovun layihəsini incəsənət, dizayn və animasiya modelləşdirilməsində bədii dəyərlər baxımından yüksək qiymətləndirmişdir. Onun sözlərinə görə, Elçin Orucovun animasiya personajları layihəsi Ukraynanın milli brendinə çevrilə bilər. T.Kostenko hesab edir ki, müasir aqressiv personajlarla müqayisədə onun personajları xeyirxahlıq və məhəbbət bəxş edir. Onları sevməmək mümkün deyildir. T.Kostenko demişdir ki, layihəyə lazımi diqqət göstərilsə və komanda yetərincə çalışsa, Tartoniya dünyasının sakinləri planetimizin bütün uşaqlarının ürəyini fəth edə bilər.

Layihə kafedra rəhbərliyinin o qədər xoşuna gəlmişdir ki, onlar “Tartonikləri” tədris planına daxil etmişlər. Buna paralel olaraq, ali məktəbdə tələbələr arasında “Tartoniki” adlı müsabiqə keçirilir. Müsabiqədə iştirak etmək arzusunda olan tələbələr əl altında olan kompyuter texnologiyalarının köməyi ilə qısa animasiya çarxı çəkməli idilər. Bir sözlə, kafedra tələbələrə kompyuter qrafikasının ən müasir metodlarını öyrədir. İştirakçıların sayı çox olsa da, mükafatlı yerlərə namizəd olan 12 tələbə qalmışdır. Müsabiqənin dörd aralıq turu keçirilmişdir. Nəticədə fevralın 5-də müsabiqənin təntənəli bağlanış mərasimi olmuşdur. Burada tələbələr animasiya sahəsində özlərinin qeyri-adi bacarıqlarını nümayiş etdirmişlər. İlk üç yeri tutan tələbələr müsabiqə təşkilatçılarından pul mükafatları almışlar.

T.Kostenko və kafedranın müəllimləri Elçinlə bundan sonra da əməkdaşlıq etmək arzusunda olduqlarını bildirmişlər. Həmvətənimiz paralel olaraq, daha iki layihə üzərində işləyir. Onlardan biri plastilindən qeyri-adi personajlar hazırlamağı uşaqlara öyrədən kitabdır. İkinci layihə “Tartoniki” animasiya çarxının çəkilişidir. Həmin çarx uşaqlar üçün eyniadlı animasiya seriyalı barədə anons olacaqdır.

Xatırladaq ki, Ukraynada sənaye məmulatı dizaynerləri, qrafik dizayn, habelə interyerin, dekorativ parça, geyim və s. layihələndirilməsi sahəsində mütəxəssislər hazırlayan yeganə ali təhsil müəssisəsində uzun illərdir həmvətənimiz, heykəltəraşlıq kafedrasının dosenti, Ukraynanın Xalq Rəssamı Seyfəddin Qurbanov uğurla dərs deyir.

Seyfəddin Qurbanov və Elçin Orucov kimi insanlar Azərbaycan diasporunu Ukraynada layiqincə təmsil edirlər. Razılaşın ki, həyatın müxtəlif sahələrində çalışan insanlar kimi incəsənət adamları da harada yaşayırlar-yaşasınlar tarixi Vətənin başını daim ucaldır, adını şöhrətləndirirlər.

Zeynal Ağazadə

AZƏRTAC-ın xüsusi müxbiri

Kiyev