Əmircan qəsəbəsində sakinlərin problemləri dinlənilib
Bakı, 26 oktyabr, AZƏRTAC
Azərbaycan Prezidenti İlham Əliyevin dövlət qurumları rəhbərlərinin yerlərdə əhali ilə görüşlərinin keçirilməsinə dair tapşırığına uyğun olaraq Bakı Şəhər İcra Hakimiyyətinin başçısı Eldar Əzizovun Suraxanı rayonu Əmircan qəsəbəsinin sakinləri ilə görüşü keçirilib.
Bakı Şəhər İcra Hakimiyyətinin mətbuat xidmətindən AZƏRTAC-a bildirilib ki, qəsəbə sakinlərinin problemlərinin öyrənilməsi və aradan qaldırılması məqsədilə təşkil olunan və 400-ə qədər Əmircan sakininin iştirak etdiyi görüşdə vətəndaşların müraciət və təklifləri dinlənilib.
Görüşdə Bakı Şəhər İcra Hakimiyyətinin başçısı Eldar Əzizov bildirib ki, bu gün Azərbaycan xalqı böyük hadisələrin şahidi olaraq sevincli günlər yaşayır. İki yüz ildən artıq davam edən erməni-müsəlman qarşıdurmasına nəhayət ki, son qoyulub, Azərbaycan Ordusu şanlı Qələbə qazanaraq torpaqlarımızı işğaldan azad edib. Möcüzə hesab etdiyimiz hadisə reallaşıb, Xankəndi şəhərində Dövlət Bayrağımız ucaldılıb. Bütün bunlar dövlətimizin başçısı İlham Əliyevin dahi intellekti və müdrik siyasətinin nəticəsidir.
Tədbirdə Prezident İlham Əliyevin və Birinci vitse-prezident Mehriban xanım Əliyevanın işğaldan azad edilən torpaqların bərpası və inkişafı istiqamətində gördükləri işlər xüsusi vurğulanıb.
Sonra Suraxanı Rayon İcra Hakimiyyəti başçısının Əmircan qəsəbəsi üzrə nümayəndəsi Əlixan Əliyev qəsəbədə görülmüş işlərlə bağlı hesabat verib.
Sakinlərin böyük fəallığı ilə “açıq mikrofon” formatında, dialoq şəklində keçən görüşdə 30-dan çox qəsəbə sakininin çıxışı və müraciəti dinlənilib, onlar son vaxtlarda Bakı şəhərində və eyni zamanda, Əmircan qəsəbəsində görülən işlərə, onlara göstərilən diqqət və qayğıya görə Prezident İlham Əliyevə və Birinci vitse-prezident Mehriban Əliyevaya minnətdarlıqlarını bildirib, dövlətimizin başçısının həyata keçirdiyi siyasi kursa birmənalı dəstək ifadə ediblər.
Qarabağ müharibəsi qazisi İsrafil Hüseynov öz çıxışında Vətən müharibəsində qazanılan Qələbənin memarı, Prezident, Müzəffər Ali Baş Komandan İlham Əliyevə Azərbaycanın Milli Qəhrəmanı adının verilməsini təklif edib. Təklif görüş iştirakçılarının sürəkli alqışları ilə qarşılanıb.
Müraciətlər əsasən fərdi yaşayış evlərinin sənədləşdirilməsi, Murtuza Muxtarov məscidinin əsaslı təmir edilməsi, qəsəbədə su və kanalizasiya xətlərinin yenilənməsi, məhəllədaxili yolların təmiri və işıqlandırılması, məşğulluq, yeni avtobus xəttinin açılması, qəzalı binaların və dam örtüyünün təmiri və sairləri ilə bağlı olub.
Görüş zamanı bəzi müraciətlər yerində həll edilib, sakinlərin digər müraciət və təklifləri ilə bağlı müvafiq tapşırıqlar verilib, bütün müraciət və təkliflər nəzarətə götürülüb.
Bölmənin digər xəbərləri
