Bakı, 29 yanvar (AZƏRTAC). Əmlak Məsələləri Dövlət Komitəsində (ƏMDK) 2012-ci ildə görülmüş işlər və qarşıda duran vəzifələrə dair iclas keçirilmişdir.

Komitədən AZƏRTAC-a bildirmişlər ki, iclasda bildirilmişdir ki, 2012-ci ildə dövlət əmlakının idarə olunması, qorunub saxlanılması, ondan səmərəli istifadə edilməsi, özəlləşdirilməsi, icarəyə verilməsi, daşınmaz əmlak üzərində hüquqların qeydiyyatı, daşınmaz əmlakın vahid kadastrı və ünvan reyestrinin aparılması istiqamətlərində qanunvericilikdə nəzərdə tutulmuş tədbirlərin icrası davam etdirilmişdir.

Bildirilmişdir ki, komitənin fəaliyyət proseslərində qanunçuluğun, vətəndaşların hüquq və azadlıqlarının səmərəli şəkildə təmin olunması, şəffaflığın daha da artırılması, korrupsiya hallarının qarşısının alınması məsələləri diqqət mərkəzində saxlanılmışdır.

Azərbaycan Respublikası Prezidentinin “Dövlət orqanlarının elektron xidmətlər göstərməsinin təşkili sahəsində bəzi tədbirlər haqqında” Fərmanının icrası istiqamətində komitə tərəfindən müvafiq işlər həyata keçirilmişdir. Belə ki, artıq komitə tərəfindən bir sıra fəaliyyət istiqamətləri üzrə, o cümlədən daşınmaz əmlak üzərində hüquqların təkrar qeydiyyatı və yüklülük arayışlarının alınması, müsadirə edilmiş əmlakın satışı ilə bağlı da keçirilən hərraclarda iştirak etmək elektron xidmətlər tətbiq edilir. Hazırda komitə tərəfindən daşınmaz əmlak idarəçiliyi və qeydiyyatı sahəsində əhaliyə, fiziki və hüquqi şəxslərə beynəlxalq standartlara uyğun elektron xidmətlərin daha da genişləndirilməsi istiqamətində işlər davam etdirilir. Belə ki, yalnız ötən il ərzində Bakı şəhəri və respublikanın müxtəlif regionlarından daxil olmuş 1600-ə yaxın elektron müraciət qeydə alınmış və icra edilmişdir.

2012-ci ildə respublika üzrə kiçik özəlləşdirmə formasında 600-ə yaxın müəssisə və obyekt, 620-yə yaxın obyektin yerləşdiyi torpaq sahəsi özəlləşdirilmişdir. 13 min 841 dövlət təsisatı və filialının 143 min 837 daşınmaz əmlakı barədə məlumatlar dövlət əmlakının registrində qeydiyyata alınmışdır.

Hesabat dövrü ərzində dövlət əmlakının qorunub saxlanması və mühafizəsi, ondan təyinatı üzrə səmərəli istifadə edilməsi, daşınar dövlət əmlakının icarəyə və istifadəyə verilməsi, dövlət, habelə özəlləşdirilən müəssisə və obyektlərin yerləşdiyi dövlətə məxsus torpaq sahələrindən istifadə vəziyyətinin araşdırılması, dövlət müəssisələrinin özəlləşdirmədən sonrakı fəaliyyətinin monitorinqinin aparılması, müəssisələrdən hesabatların və inventarizasiya aktlarının alınması və təhlili istiqamətində işlər həyata keçirilmişdir.

Dövlət əmlakının mövcudluğu, qorunub saxlanılması və ondan səmərəli istifadə olunması, dövlət büdcəsinə çatacaq dividendlərin hesablanması və ödənilməsi vəziyyətinin araşdırılmasına dair ümumilikdə 170-ə yaxın monitorinq keçirilmişdir.

Vətəndaşların daşınmaz əmlaklarının qeydiyyatının daha rahat və operativ qaydada aparılması məqsədi ilə artıq yerli qeydiyyat idarələrində sənəd qəbulu həftənin bütün iş günlərində və iş gününün sonunadək həyata keçirilir. Bundan başqa, ərazi qeydiyyat idarələrində “elektron növbəlilik” sisteminin tətbiqinə başlanılmışdır.

Əmlak Məsələləri Dövlət Komitəsi tərəfindən daşınmaz əmlakın dövlət reyestri xidmətinin sadələşdirilməsi ilə bağlı qanun layihəsi hazırlanıb hökumətə təqdim edilmişdir.

Respublika üzrə 150 minə yaxın daşınmaz əmlak obyekti üzərində mülkiyyət hüquqları qeydiyyata alınmışdır. Bunlardan 42 minə yaxını ilkin, 108 minə yaxını isə təkrar qeydiyyat olmuşdur. Bununla yanaşı 32 mindən çox ipoteka müqaviləsi dövlət qeydiyyatına götürülmüşdür.

Müşavirədə dövlət əmlakının idarə edilməsi və özəlləşdirilməsi, habelə daşınmaz əmlak üzərində hüquqların qeydiyyatı ilə bağlı əhaliyə göstərilən xidmət keyfiyyətinin müasir tələblərə uyğunlaşdırılması, bu sahədə şəffaflığın və səmərəliliyin daha da artırılması məqsədi ilə komitədə elektron xidmətlərin tətbiqinin genişləndirilməsinin vacibliyi bildirilmişdir.