Ər-Riyadda BMT-nin qlobal sənaye sammiti keçirilir
Bakı, 24 noyabr, AZƏRTAC
Noyabrın 23-də Səudiyyə Ərəbistanının Ər-Riyad şəhərində açılan Birləşmiş Millətlər Təşkilatının Sənaye İnkişafı Təşkilatının (UNIDO) 21-ci Baş Konfransında dünyanın hər yerindən liderlər iqlim dəyişikliyi və ərzaq təhlükəsizliyindən tutmuş daha ədalətli təchizat zəncirlərinə qədər sənayenin dünyanın ən təcili problemlərinin həllinə necə kömək edə biləcəyini müzakirə edirlər.
AZƏRTAC xəbər verir ki, BMT-nin Baş katibi Antonio Quterreşin tədbirə ünvanlanan mesajında bildirir: “Sənayenin inkişafı iqtisadiyyatların gücləndirilməsi, yoxsulluqla mübarizə, iş yerlərinin və rifahın yaradılması üçün vacibdir”.
Hökumətlərin, özəl sektorun və vətəndaş cəmiyyətinin nümayəndələri tənəzzül dövründə olan iqtisadiyyatlar üçün həssas bir vaxtda bir həftəlik tədbir üçün Səudiyyə paytaxtına gəliblər. Bildirilib ki, bir neçə varlı ölkə yoxsul dövlətlərə inkişaf yardımı xərclərini azaldıb. Şənbə günü başa çatan COP30 iqlim konfransı bəzi millətlər, xüsusən də inkişaf etməkdə olan dövlətlər üçün mövcud təhlükə olan iqlim böhranının miqyasını üzə çıxarıb.
A.Quterreş hökumətləri və müəssisələri davamlı sənayeləşməni genişləndirməklə (daha təmiz, resurs baxımından səmərəli texnologiyaların tətbiqi, infrastrukturun təkmilləşdirilməsi və sənaye inkişafının həddindən artıq sosial və ya ekoloji xərclərlə nəticələnməməsini təmin etməklə) bu yükü aradan qaldırmaq üçün səyləri birləşdirməyə çağırıb. Bu, BMT-nin beynəlxalq əməkdaşlıq, sülh və inkişaf üçün planı olan Gələcək Paktının vacib tövsiyəsidir.
Sammit yoxsulluğu azaldan, iqtisadi rəqabət qabiliyyətini artıran və inkişaf etməkdə olan ölkələrdə ətraf mühitin dayanıqlığını dəstəkləyən inklüziv və davamlı sənaye inkişafının təşviqinə həsr olunmuş UNIDO-nun ən yüksək qərar qəbuletmə orqanı olan builki konfransdakı müzakirələr üç əsas mövzuya yönələcək: emissiyaları azaltmaq və bərpaolunan enerji mənbələrindən istifadəni dəstəkləmək, qida təhlükəsizliyini yaxşılaşdırmaq üçün aqrosənaye innovasiyası vasitəsilə aclığa son qoymaq və ticarətin işçilərə, icmalara, ətraf mühitə fayda verməsini təmin edən davamlı təchizat zəncirlərini inkişaf etdirmək.
Bazar günü nümayəndələr qarşısında çıxış edən UNIDO-nun baş direktoru Gerd Müller inkişaf etmiş dünyanı bərabərsizliklə mübarizə aparmaq üçün daha çox iş görməyə çağırıb: “Varlı dövlətlər, sənayeləşmiş ölkələr, neft hasilatçıları qlobal məsuliyyətlərini yerinə yetirməlidir. Onlar illik büdcələrinin 0,7 faizini xarici inkişaf yardımına xərcləməyi vəd etdikdən 30 il sonra hələ də bu rəqəmə çatmayıblar”.
Baş direktor əlavə edib ki, inkişaf etməkdə olan ölkələrin dünya maliyyə sisteminə daha yaxşı çıxışının və ABŞ-ın son siyasəti fonunda bazarlara sıfır tarif çıxışı olan “Yeni qlobal ədalətli saziş”i imzalamağın vaxtıdır.
Dünyanın digər tərəfində, Cənubi Afrikada, dünyanın ən qabaqcıl iqtisadiyyatlarının liderləri illik G20 sammitində görüşürlər. G.Müller onlara müraciətində bildirib ki, Ümumdünya Ərzaq Proqramı (ÜƏP) və Ümumdünya Səhiyyə Təşkilatı (ÜST) daxil olmaqla BMT-nin yardım agentliklərinə 40 faizə qədər dərin maliyyələşdirmə kəsintiləri ləğv olunmalıdır.
BMT-nin Ərzaq və Kənd Təsərrüfatı Təşkilatının rəhbəri isə çıxışında xəbərdarlıq edib ki, “bu, dünyanın böhran bölgələrində yaşayan milyonlarla uşaq, qaçqın və insan üçün ölüm hökmündən başqa bir şey deyil”.
Bölmənin digər xəbərləri
