Erməni uşağın fəryadı!
Bakı, 20 iyun (AZƏRTAC). Ermənistanda vəziyyət gündən-günə daha acınacaqlı hal alır. Bu ölkədə vətəndaşların sosial vəziyyətinin getdikcə daha da pisləşməsi ilə yanaşı, hüquq və azadlıqlarının kobud şəkildə pozulması da geniş vüsət almışdır. Həyat şəraitinin daha da ağırlaşması ilə üzləşən ermənilər artıq yeganə çıxış yolunu ölkəni kütləvi şəkildə tərk etməkdə görürlər. Son vaxtlar Ermənistanda vəziyyətin pisləşməsi ilə əlaqədar kömək üçün başqa dövlətlərə və beynəlxalq təşkilatlara müraciət edənlərin sayı da durmadan artır. Onların arasında uşaqlar və gənclər üstünlük təşkil edir.
On dörd yaşlı David Davtyan da Ermənistanda hüquqları kobud şəkildə pozulan uşaqlardandır. O, doğulduğu, yaşadığı ölkəsinə kəskin şəkildə etiraz edir. Təhsil almaq istədiyi ölkəsində ona qarşı yaradılan maneələri dəf edə bilmədiyindən nicat yolunu kənarda axtarmağa məcbur olmuş Davidin beynəlxalq təşkilatlara, ayrı-ayrı dövlətlərə, o cümlədən qonşu Azərbaycana kömək üçün müraciət etməkdən başqa əlacı qalmamışdır. David altı ildir ki, məktəbə getmir. Bunun səbəbini isə erməni faşizmində görür. Əslində çoxları düşünə bilərlər ki, bu, onun valideynlərinin problemidir. Bəs onda sual yaranır ki, valideynlərin bu problemi haradan qaynaqlanır?! Sözsüz ki, insanların hüquqlarının kobud şəkildə pozulduğu Ermənistan cəmiyyətindən, bu ölkənin hazırkı iqtidarının yürütdüyü siyasətdən.
“Erməni faşizmi məni yeyir!” deyərək hayqıran David Davtyan ona qoyulmuş qadağaları dəf edə bilmədiyindən və ölkəsindən heç bir yardım görmədiyindən Azərbaycan hökumətinə, ombudsmanına, ölkəmizin aparıcı kütləvi informasiya vasitələrinə, qeyri-hökumət təşkilatlarına üz tutmuşdur. David hər zaman humanist aksiyaları ilə təkcə Azərbaycanda deyil, bütün dünyada tanınan, xüsusilə uşaqlara daha çox diqqət və qayğı göstərən Heydər Əliyev Fonduna da müraciət etməklə bu qurumdan yardım istəyir.
Davidin “Xahiş edirəm mənim həyatımı xilas edin!”, “Mənə kömək edin!” fəryadı əslində minlərlə, on minlərlə erməni uşağının naləsidir. O, başına gələnləri yazaraq beynəlxalq qurumlardan, xüsusilə də Azərbaycandan kömək istəyir.
Əslində Ermənistanda uşaqlar, gənclər də daxil olmaqla insanlar yaxşı başa düşürlər ki, iqtisadiyyatının diz çökmək üzrə olduğu bu ölkədə onların gələcəyi məhvə məhkumdur. Hətta bu gün Ermənistan vətəndaşları çörək pulu əldə etmək üçün öz orqanlarını da satmaq məcburiyyətində qalmışlar. Buna görə də insanların ölkəni kütləvi şəkildə tərk etmələri, onların nicat yolunu başqa ölkələrdə axtarmaları başa düşüləndir. Onlar yaxşı anlayırlar ki, Ermənistandakı bugünkü dözülməz vəziyyətə bais olan hakimiyyət təkcə ölkənin deyil, həm də regionun da gələcəyi üçün ciddi təhlükədir.
Ermənistanı kütləvi şəkildə tərk edən, başqa ölkələrdən sığınacaq istəmək məcburiyyəti ilə üzləşən vətəndaşların şikayətləri dəyişməz olaraq qalır. Ermənistan vətəndaşları bir qayda olaraq milli və siyasi mənsubiyyətə, 2008-ci il prezident seçkilərindən sonra mitinqlərdə iştiraka görə təqib olunduqlarını bildirirlər. Son dövrlərdə sığınacaq istəyənlər arasında mafioz qrupların və ölkədə nüfuz sahibi olan şəxslərin çəkişmələrinin qurbanlarına da rast gəlinir.
Sözsüz ki, Azərbaycan dünya uşaqlarına göstərdiyi dəstəyi David Davtyana da göstərə bilər. Axır-əvvəl Ermənistan hökuməti də anlamalıdır ki, regionun gələcəyi Azərbaycandan çox asılıdır.
Albina Atlıxanova
AZƏRTAC-ın müxbiri
Bölmənin digər xəbərləri
