SİYASƏT
ERMƏNİSTAN BÜTÜN LAYİHƏLƏRİN “ƏSAS ELEMENTİDİR”!
Berlin, 23 noyabr (AZƏRTAC). Erməni ekspertlərindən biri özü-özünü düçar etdiyi çıxılmaz geoiqtisadi düyündən xilas etmək məqsədilə qəribə bir model təklif etmişdir. Bu ekspertin layiq olmadığı reklama yol verməmək məqsədilə onun adını çəkməyəcəyik. Rusiya mətbuatında dərc edilmiş məqalənin müəllifi olan həmin ekspert yazır: “Bu gün Ermənistan birləşmiş Türkmənistan-İran-Ermənistan qaz nəqletmə şəbəkəsi vasitəsilə özünün iqtisadi cəhətdən əsaslandırılmış tranzit ərazi olduğunu göstərmək üçün çox yaxşı perspektiv imkanlar əldə etmişdir. Sabah isə birləşdirilmiş Ermənistan-İran-Türkmənistan dəmir yol magistralı istifadəyə veriləndə (bunun üçün Araz çayı üzərindən bir dəmir yol körpüsü salınması və İran dəmir yolunu Ermənistanın Mehri stansiyası ilə birləşdirən 60 kilometrlik əlaqələndirici dəmir yol zolağı çəkilməsi lazım gələcək) Ermənistan ən azı Baltik dənizi-Polşa-Ukrayna-Qara dəniz-Gürcüstan-Ermənistan-İran-Türkmənistan-Özbəkistan-Qazaxıstan-Çin-Sakit okean sahilləri yükdaşıma sxemində də şəksiz rəqabət üstünlüklərinə malik olacaqdır. Buna görə də həmin münasibətlər strukturunda Ermənistanın yeri xeyli dərəcədə bizim praqmatizmimizdən, indi hansı maraqları rəhbər tutmağımızdan və ya uzunmüddətli perspektivdə ucsuz-bucaqsız Avrasiya məkanında Qafqaz-Orta Asiya regionu dövlətlərinin yerini və əhəmiyyətini müəyyən edəcək iqtisadi modelin qurulmasında iştirak edərkən hansı mənafeləri rəhbər tutacağımızdan asılı olacaqdır. Xüsusən ona görə ki, bu münasibətləri kimlərinsə görmək istəməməsi və hətta görə bilməməsi səbəbindən həmin münasibətlər yox olmayacaqdır”.
Bu marşrut barədə fikirləşəndə gülməkdən uğunmamaq olmur. Baltik dənizini 9 (DOQQUZ!!!) tranzit dövlət (üstəgəl Qara dəniz bərəsi) vasitəsilə birləşdirmək fikrinə yalnız bütün fənnlərdən iki qiymət alan şagird düşə bilər. Halbuki bu sututarların hər ikisi (Baltik dənizi və Sakit okean) yalnız Rusiya sahillərini yuyur. Ermənistanın nifrət etdiyi Azərbaycanın geosiyasi əhəmiyyətinə paxıllıq etməsinin səbəbləri, bu hisslərin onu daxildən qurd kimi gəmirməsi tamamilə aydındır. Bütün sərsəm ideyalar da buradan yaranır. Paxıllıq edirsiniz? Nə qədər istəyirsiniz edin! Lakin adamları güldürməyə lüzum varmı?! Biz əsla şübhə etmirik ki, əgər bu cür başabəla ekspertlər Nyu-Yorku Los-Anceles ilə birləşdirən ən yaxşı marşrut müsabiqəsində iştirak etməyə dəvət olunsalar, onlar Atlantik okeanından Avrasiyaya, sonra Ermənistandan keçməklə Uzaq Şərqə və ABŞ-ın Qərb sahillərinə uzanan marşrut təklif edərlər. Doğrudan da bu, “erməni radiosu”nin ən yaxşı ənənələrinə müvafiqdir!
Vüqar Seyidov
AZƏRTAC-ın xüsusi müxbiri
Berlin