SİYASƏT
Ermənistan parlamentinin dəftərxanasından hansısa bir sənədin itməsi bu dövlətin öz başını itirməsi deməkdir
Bakı, 28 noyabr (AZƏRTAC). Qara Dəniz İqtisadi Əməkdaşlıq Təşkilatı (QİƏT) Parlament Məclisinin Baş Assambleyasının Bakıda keçirilən 40-cı plenar sessiyası çox məhsuldar keçmiş və tarixi əhəmiyyətə malik qərarların qəbulu ilə yadda qalacaqdır. Təşkilatın tarixində ilk dəfədir ki, Baş Assambleyanın plenar sessiyasında üç ölkənin parlamentinin - Azərbaycan Respublikası Milli Məclisinin, Türkiyə Böyük Millət Məclisinin və Bolqarıstan Xalq Məclisinin sədrləri iştirak etmişlər. Türkdilli Ölkələrin Parlament Assambleyasına QİƏT PM-də müşahidəçi statusu verilmişdir.
AZƏRTAC xəbər verir ki, bu sözləri QİƏT PM-in Baş Assambleyasının 40-cı plenar sessiyasının yekunlarına dair keçirilmiş mətbuat konfransında Parlament Məclisi sədrinin müavini Asəf Hacıyev demişdir. Mətbuat konfransında bu quruma üzv dövlətlərin nümayəndə heyətlərinin rəhbərləri də iştirak etmişlər.
Asəf Hacıyev demişdir ki, 3 gün davam edən sessiyada təşkilati məsələlər də həll olunmuşdur. Türkiyə nümayəndə heyətinin üzvü təşkilatın baş katibinin müavini, Yunanıstan və Bolqarıstanın nümayəndələri qurumun vitse-prezidentləri seçilmişlər. Bildirilmişdir ki, 40-cı plenar sessiyada 15-dən çox beynəlxalq təşkilatın nümayəndələri iştirak etmişdir.
QİƏT-in üzvü olan Ermənistanın bu sessiyada iştirak etməməsinə gəlincə isə qeyd edilmişdir ki, qurumun bütün üzvlərinə şifahi və yazılı formada dəvətlər göndərilmişdir. Bu ölkədən isə avqust ayında dəvətin alındığı barədə təsdiqedici sənəd alınmışdır. Lakin Ermənistan parlamentinin sədri mətbuata açıqlama verərək Baş Assambleyanın 40-cı plenar sessiyasına dəvət almadıqlarını bildirmiş sonra isə onlar təhlükəsizliklərinə yazılı şəkildə zəmanət istəmişlər. Müəyyən araşdırmalardan, dəlil və sübutlardan sonra isə Ermənistan parlamentinin sədri onlara göndərilən dəvət məktubunun itdiyini bildirmişdir.
A.Hacıyev bununla əlaqədar demişdir: “Bir ölkənin spikerinin dəftərxanasından məktub itirsə, bu, çox pis əlamətdir. Bu o deməkdir ki, bu dövlət artıq öz başını itirmişdir. Azərbaycan heç kimə yazılı şəkildə zəmanət vermir. Bu ölkəyə gələn hər bir şəxsin təhlükəsizliyi yüksək səviyyədə təmin olunur. Ona görə də, Ermənistan sadəcə bəhanələr gətirərək toplantıdan boyun qaçırmışdır. Bir ölkənin spikeri yalan danışırsa, onun siyasətindən danışmağa dəyməz. Bir daha bəyan edirəm ki, Ermənistanın növbəti dəfə hazırladığı şou baş tutmamışdır”.
QİƏT Parlament Məclisinin baş katibi Kiril Tretyak Ermənistana rəsmi dəvət məktubunun göndərildiyini təsdiq etmişdir.
Baş katib QİƏT-ə üzv dövlətlər arasında iqtisadi, mədəni və humanitar sahələrdə əlaqələrin inkişafının vacibliyini qeyd etmişdir.
Asəf Hacıyev isə demişdir: “Nə qədər ki, Azərbaycan torpaqları işğal altındadır, ölkəmizin 1 milyon qaçqın və məcburi köçkünü doğma yurdlarına qayıtmayıb Ermənistanla heç bir iqtisadi əməkdaşlıqdan söhbət gedə bilməz. Azərbaycanın bu təşkilatda iştirakı bir məsələ ilə əsaslanmışdır. Bu da ondan ibarətdir ki, əgər hər hansı bir iqtisadi layihədə Ermənistanın iştirakı olarsa, orada Azərbaycan yoxdur. Azərbaycan Ermənistan istisna olmaqla bu təşkilata daxil olan bütün dövlətlərlə isti münasibətlər qurmuşdur”.
Gürcüstan nümayəndə heyətinin rəhbəri David Saqanelidze isə diqqətə çatdırmışdır ki, qurumun Ermənistanda keçirilən sessiyasında Azərbaycan nümayəndə heyəti ilə birgə bu ölkəyə səfər etmişdir. Ancaq təəssüflər olsun ki, Ermənistan nümayəndə heyəti əsassız bəhanələr Azərbaycana gəlməkdən boyun qaçırmışdır.
David Saqanelidze Rusiya nümayəndə heyətini qurumun gələn ilin oktyabr ayında Tbilisidə keçiriləcək iclasına dəvət etmişdir. Təklifə münasibət bildirən Rusiyanın QİƏT PM-dəki nümayəndə heyətinin rəhbəri Mixail Yemelyanov bunu müsbət qarşılamış və qeyd etmişdir ki, QİƏT çərçivəsində əməkdaşlığa Rusiya tərəfi də maraqlıdır. Mixail Yemelyanov yalançı Ermənistana eyham vuraraq demişdir: “Biz sizin təklifinizi müsbət qəbul edirik və söz veririk ki, sizin dəvət məktubunuzu itirməyəcəyik”.
Sonra Bolqarıstan, Türkiyə və digər ölkələrin nümayəndələri çıxış edərək Baş Assambleyanın 40-cı plenar sessiyasının yüksək səviyyədə təşkilinə görə bir daha minnətdarlıqlarını bildirmişlər.
Sonda jurnalistləri maraqlandıran suallar cavablandırılmışdır.