FƏXRİ XİYABANDA DƏFN MƏRASİMİ
Matəm karvanı saat 16.00 radələrində Fəxri Xiyabana çatdı.
Xiyabanın girəcəyində fəxri qarovul düzülmüşdü.
Fəxri Xiyabanın ətrafı öz müdrik rəhbərini və ulu öndərini son mənzilə yola salmaq üçün əklillər və gül-çiçək dəstələri gətirmiş insanlarla dolu idi. Cənazə top lafetindən endirilərək, məzarın yanına gətirildi. Qafqaz Müsəlmanları İdarəsinin sədri şeyxülislam hacı Allahşükür Paşazadə matəm duası oxuduqdan sonra üzərinə Azərbaycanın dövlət bayrağı çəkilmiş tabut məzara endirildi.
Müdafiə Nazirliyinin nümunəvi hərbi orkestrinin ifasında Azərbaycan Respublikasının Dövlət himni səsləndi. Toplardan yaylım atəşi açıldı.
Prezident Heydər Əliyevin dini və mənəvi dəyərlərimizə verdiyi yüksək qiymətdən, müqəddəs ziyarətgahlarımızın bərpasına göstərdiyi qayğıdan hər zaman razı qalan din xadimləri mərhum Prezidentin ruhuna yasin surəsi oxudular.
Şeyxülislam hacı ALLAHŞÜKÜR PAŞAZADƏ dəfn mərasiminə toplaşanlara müraciətlə dedi:
- Allah rəhmət eləsin!
Bu gün bizim üçün çox qəmli bir gündür. Bu yolu gələrkən düşündüm ki, mən ömrümdə iki dəfə bu qədər insan seli görmüşəm. Birinci dəfə 20 Yanvar hadisələri zamanı bu qədər insanın küçələrə çıxaraq, öz əzizlərini yola saldığının şahidi olmuşam. Bu gün xalq müstəqil Azərbaycanın qurucusu, istəkli və əziz Prezidentini, öndərini son mənzilə yola salmaq üçün küçələrə çıxmışdır. Mən buraya gələrkən fikirləşirdim ki, Heydər Əliyevin nəsihətləri heç vaxt yaddan çıxmayacaq. Xalqın bu matəm günündə küçələrə çıxması Heydər Əliyevin siyasətinə səs vermək, İlham Əliyevi dəstəkləmək deməkdir.
Burada uzaqdan gəlmiş prezidentlər, baş nazirlər vardır. Heydər Əliyevin yaxın dostları gəliblər.
Allah dəfn olunanların da hamısına rəhmət eləsin, biz onların heç birini yaddan çıxarmırıq.
Mənim sizdən bir xahişim var. Prezidentimiz ömrü boyu yaxşılıq etmişdir və heç kimdə onun xətri yoxdur. Mən şeyxülislam kimi deyirəm: kimdə bir halallıq haqqı varsa, oğluna müraciət edə bilər. Gördüyü bu qədər işlərə görə biz hamımız onun haqqını halal etməliyik.
Allah-Təala ona rəhmət eləsin!
İlham müəllim, mən Sİzə, ailə üzvlərinizə, mərhumun qardaşlarına başsağlığı verirəm. Allah Sizə hər vaxt kömək olsun. Onu bilin ki, inşallah, biz Heydər Əliyevin nəsihətlərini heç zaman yaddan çıxarmarıq. Xalq Sizinlədir.
Mən bu məzarın qarşısında söz verirəm ki, həmişə Heydər Əliyevin və Sizin siyasətinizi dəstəkləyəcəyik. Ən mühümü odur ki, Heydər Əliyev bizə Sizin kimi töhfə verib və inşallah, bu işıq, bu nur axıra qədər davam edəcəkdir.
X X X
Sonra şeyxülislam Fəxri Xiyabanın ətrafına toplaşmış yüz minlərlə insana müraciətlə dəfn mərasiminin davam edəcəyini və buraya gəlmiş camaatın hamısının öz sevimli və əziz Prezidentinin məzarını ziyarət edə biləcəyini elan etdi.
Dəfn mərasimində iştirak edən dövlət və hökumət başçıları, digər xarici qonaqlar, səfirlər Azərbaycan Prezidenti İlham Əliyevə bir daha səmimi başsağlığı verdilər.
Saat 17.00 radələrindən başlayaraq, Azərbaycan vətəndaşları xalqımızın ümummilli liderinə sonsuz məhəbbətinin, onun misilsiz xidmətlərinə görə dərin minnətdarlığının ifadəsi olaraq, Prezident Heydər Əliyevin məzarına axışmağa başladı. Gözlərində yaş, qəlblərində kədər qarışıq qürur olan ağsaqqallar, ağbirçəklər, gənclər, Heydər babanı məsum baxışları ilə son mənzilə yola salmış uşaqlar saysız-hesabsız əklillər, gül-çiçək arasında görünməz olmuş məzarın önündən keçir, ən BÖYÜK AZƏRBAYCANLININ müqəddəs ruhu qarşısında baş əyirdilər.
Fəxri Xiyabana insan axını gecə yarıyadək davam etmişdir.
Allah Prezident Heydər Əliyevə rəhmət eləsin, qəbri nurla dolsun!
Vidalaşma və dəfn mərasimi Azərbaycan televiziyası vasitəsilə ölkənin bütün telekanalları ilə birbaşa yayımlanmışdır.
Bölmənin digər xəbərləri
