SİYASƏT
Fosforlu və kasetli bombalardan istifadə edən Ermənistan beynəlxalq hüququ kobud şəkildə pozur
Bakı, 9 oktyabr, AZƏRTAC
Əgər Ermənistan danışıqlar masasına əyləşmək istəyirsə, ilk növbədə, BMT Təhlükəsizlik Şurasının 1993-cü ildə - erməni işğalçı qüvvələrinin Azərbaycanın ərazilərini ələ keçirdikləri dövrdə qəbul edilmiş 4 qətnaməsini tam olaraq yerinə yetirməlidir. Çünki bu qətnamələrdə göstərilir ki, işğal olunmuş ərazilərin dərhal, qeyd-şərtsiz və tamamilə qaytarılması təmin edilməlidir.
Bunu AZƏRTAC-a açıqlamasında Yeni Azərbaycan Partiyası Nizami rayon təşkilatının sədri, Milli Məclisin deputatı Sədaqət Vəliyeva söyləyib.
Sədaqət Vəliyeva bildirib ki, erməni tərəfi ötən 27 il ərzində həmin qətnamələri yerinə yetirmir, onlara məhəl qoymur və hər vasitə ilə münaqişəni mümkün qədər uzun müddətə dondurmağa çalışıb. O deyib: “Bu günə qədər status-kvonun qəbuledilməz və dəyişdirilməli olması barədə beynəlxalq ictimaiyyətin, o cümlədən ATƏT-in Minsk qrupunun həmsədr ölkələrinin bütün çağırışları havada qalıb. Ermənilərin mövqeyi tarixi yalana, beynəlxalq hüququn norma və prinsiplərinin pozulmasına əsaslandığı halda, Azərbaycanın mövqeyi beynəlxalq hüququn norma və prinsiplərinə, tarixi ədalətə əsaslanır. Ona görə də bu gün Azərbaycan Ordusu tarixi ədaləti bərpa edir. Hətta deyərdim ki, Azərbaycan Ordusu BMT Təhlükəsizlik Şurasının məlum qətnamələrini icra edir. Lakin Ermənistanın çox ağır duruma düşməsinə baxmayaraq, Paşinyan BMT Təhlükəsizlik Şurasının qətnamələrini aşağılayır, onların mahiyyətini təhrif etməyə cəhd göstərir. Biz bunu onun BBC-yə müsahibəsində də müşahidə etdik”.
Deputat diqqətə çatdırıb ki, bu gün Ermənistanın mülki əhalini, yaşayış məntəqələrini, münaqişə zonasından kilometrlərlə uzaqda yerləşən məntəqələri hədəfə alması, strateji xarakterli, transmilli obyektlərə raket atması, hətta fosforlu, kasetli bombalardan istifadə etməsi beynəlxalq hüququn kobud və nümayişkaranə şəkildə pozulması deməkdir. Ermənistan döyüş meydanında məğlubiyyətə uğrayanda dinc əhaliyə ziyan vurmağa və Azərbaycan Ordusunun əks-hücumunu dayandırmağa çalışaraq alçaq hərəkətlərə əl atır. Münaqişə zonasının bilavasitə yaxınlığında yerləşən Tərtər şəhərinin, əhalisinin sayına görə Azərbaycanın ikinci böyük şəhəri olan və münaqişə zonasında kənarda yerləşən Gəncənin əhalisi atəşə tutulub. Mingəçevirdə Azərbaycanın ən böyük elektrik stansiyasının ərazisinə bir raket düşüb, 10-dan çox şəhərimiz, yüzlərlə kəndimiz şiddətli artilleriya bombardmanına məruz qalıb və qalmaqdadır. Ermənistan tərəfindən “Smerç”, “Toçka U” və “Elbrus” kimi ölümsaçan sistemlər, artilleriya atəşləri nəticəsində 30-dan çox dinc sakin həlak olub, 170-dən çox dinc sakin müxtəlif dərəcəli xəsarətlər alıb, 800-dən çox ev dağıdılıb. Heç şübhəsiz ki, bu, Cenevrə konvensiyalarının çox kobud şəkildə pozulmasıdır, müharibə cinayətidir”.
“Ermənistandan fərqli olaraq, Azərbaycan Ordusu yalnız hərbi obyektləri hədəfə alır, mülki əhaliyə ümumiyyətlə zərər yetirmir”, - deyən Sədaqət Vəliyeva əlavə edib ki, Azərbaycan Qarabağ ərazisində yaşayan ermənilərə öz vətəndaşları kimi baxır. Bu da gözlənilən və anlaşılan məsələdir. Çünki münaqişə nizamlanandan, işğala son qoyulandan sonra Dağlıq Qarabağın erməni və azərbaycanlı əhalisi uzun illər boyu olduğu kimi yenidən birlikdə yaşamalıdır. Ümumiyyətlə, Azərbaycanın mübarizəsi erməni xalqı ilə deyil. Azərbaycan dünya miqyasında multikultural ölkə kimi tanınır, tolerantlıq, milli, dini dözümlülük məkanıdır. Bu səbəbdən də münaqişə başa çatandan sonra Dağlıq Qarabağda yaşayan ermənilər də azərbaycanlılarla bərabər yaşayacaqlar.