Bakı, 21 fevral, AZƏRTAC

Fevralın 21-də Azərbaycan Respublikası Fövqəladə Hallar Nazirliyi (FHN) işçilərinin həmkarlar ittifaqının 2021-ci ildəki fəaliyyətinin yekunlarına həsr olunmuş hesabat-plenumu keçirilib.

FHN-in mətbuat xidmətindən AZƏRTAC-a bildiriblər ki, illik hesabat yığıncağında nazirliyin işçilərinin həmkarlar ittifaqının sədri Mehman İsmayılov, nazirliyin regional mərkəzlərində və qurumlarında fəaliyyət göstərən həmkarlar ittifaqı komitələrinin sədrləri iştirak ediblər.

Plenumda Mehman İsmayılovun FHN işçiləri həmkarlar ittifaqının 2021-ci ildə gördüyü işlər haqqında geniş hesabat məruzəsi dinlənilib.

Ötən il respublikamızın milli bayram, əlamətdar günlərində və peşə bayramlarında ittifaq tərəfindən bir çox tədbirlər təşkil edildiyini diqqətə çatdıran sədr M.İsmayılov həmin tədbirlər çərçivəsində FHN-in tabeliyində olan, o cümlədən Vətən müharibəsi zamanı fədakarlıq göstərərək xidməti vəzifələrini layiqincə yerinə yetirən yanğınsöndürənlərin fəaliyyətini qiymətləndirmək məqsədilə Dövlət Yanğından Mühafizə Xidmətinin işğaldan azad olunmuş ərazilərimizdə fəaliyyət göstərən hissələrində keçirilmiş görüşlərdən danışıb, bayram sovqatları və xatirə hədiyyələrinin təqdim edildiyini bildirib. Qeyd olunub ki, Vətən müharibəsi zamanı Ermənistan silahlı qüvvələri tərəfindən Bərdə şəhərinə endirilən raket zərbələri nəticəsində xidməti vəzifəsini yerinə yetirərkən şəhid olmuş FHN-in əməkdaşı Şəfiyev Rəşad Vaqif oğlunun ailəsi diqqətdə saxlanılıb. Aprel döyüşləri zamanı şəhid olmuş kiçik gizir Orxan Həmidovun FHN işçilərinin həmkarlar ittifaqı tərəfindən himayəyə götürülmüş iki övladının hər birinə ittifaq tərəfindən 2020-ci ilin sentyabrından etibarən təyin edilmiş aylıq 150 manat olmaqla 300 manat məbləğində maddi yardımın ödənilməsi davam etdirilib.

M.İsmayılov nəzərə çatdırıb ki, 2021-ci ilin yayında Türkiyədə meşə yanğınlarının söndürülməsində və fəlakət zonasında zəruri axtarış-xilasetmə əməliyyatlarının yerinə yetirilməsində fərqləndiklərinə görə FHN-in müvafiq əməkdaşları ittifaq tərəfindən fəxri fərmanla təltif olunub.

İttifaqın dəstəyi ilə FHN-in Akademiyasında, Qarabağ və Gəncə regional mərkəzlərində şəhid və qazi övladları üçün “açıq qapı” günləri keçirilib və şəhid və qazi uşaqlarına hədiyyələr və fəxri fərmanlar təqdim edilib.

İttifaq tərəfindən, həmçinin üzvlərinin sağlamlığını qorumaq, əməkdaşların peşəkarlığını artırmaq və bölmələrarası əlaqələri intensivləşdirmək məqsədilə Fövqəladə Hallar Nazirliyinin Dövlət Yanğından Mühafizə Xidməti ilə birgə yanğın-xilasetmə idmanı üzrə respublika birinciliyi, “Ən yaxşı manqa” və “Köpük verməklə ən yaxşı manqa” adı uğrunda baxış-müsabiqələri keçirilib.

Bildirilib ki, bundan başqa, nazirliyin əməkdaşları müalicə və istirahət məqsədilə müxtəlif sanatoriyalara və istirahət mərkəzlərinə yollayışlarla təmin olunublar. Eyni zamanda, maddi vəziyyəti aşağı olan, vəfat etmiş və ya ailə üzvlərindən birinin vəfatı ilə əlaqədar, özünün və ya ailə üzvünün xəstəliyinin müalicəsinə maddi köməklik məqsədilə 555 nəfər ittifaq üzvünə maddi yardım ödənilib. 2021-ci ildə yubiley yaşları tamam olan təcrübəli FHN əməkdaşları da həmkarlar ittifaqı tərəfindən fəxri fərmanla təltif edilib və qiymətli hədiyyələrlə mükafatlandırılıblar.

Mehman İsmayılov çıxışının sonunda qeyd edib ki, FHN işçilərinin həmkarlar ittifaqı qarşısında duran bütün vəzifələrin həlli üçün bundan sonra da səylə çalışacaq, üzvlərinin əmək və sosial hüquqlarının təmin olunmasına daim yardım edəcək.

Hesabat məruzəsi dinlənildikdən sonra ittifaqın digər illik cari məsələləri və 2022-ci il üçün qəbul edilmiş tədbirlər planı müzakirə olunub, komitə sədrlərinin təklifləri dinlənilib.